Dîlan Babat

 

ANQARA - Rojnamegere Berîvan Altana ke Zîndanê Cinîyan yê Sîncanî de yena tepiştiş dîyar kerd ke înan herinda bêvengîye de xoverdayîş tercih kerdê û seba ke raştî nuştê ameyê tepiştiş. Berîvane da zanayîş ke sebebê hadrenêkerdişê îdîanameyî zî prosesê weçînayîşî de tepişte mendişê înan o û wina vat: “Ez veng dana rojnamegeran ke hemverê zextanê serê çapemenîya azade de bêveng nêmanê. Eke wazenê tarîtîye de bimanê azadî yê înan o.”

 

Çarçewa tehqîqatêkê Serdozgerîya Komare ya Anqara de 25ê teşrîna verêne 2021î de Mudira Karanê Nuşteyî yê Ajansê Mezopotamya (MA) Dîren Yurtsever, muxabîrê MA Denîz Nazlim, Salman Goleryuz, Berîvan Altan, Hakan Yalçin, Emrullah Acar, Ceylan Şahînlî, muxabîrê JINNEWSî Habîbe Eren û Oznur Deger 29ê teşrîna peyêne de bi îşkenceyî ameybî destbendkerdiş.

 

Rojnameger Berîvan Altana ke Zîndanê Cinîyan yê Sîncanî de yena tepiştiş derheqê îdîanameyê ke di aşmî yo nînê hadrekerdiş û binpaykerdişê heqan de qisey kerd.

 

Berîvane dîyar kerd ke 25ê teşrîna verêne û dima yê ci de xeylê bêhuqûqî ameyî cuyayîş û wina vat: “Wexto ke ez ameya destbendkerdiş verê berî de dam dabî vindarnayîş û peynî ra ez ameya kelemçekerdiş. Esasê xo de heme çî mîzansenêk bî. Teber de polîsê têgêrayîşê taybet û di polîsê cinîyî estbî. Seba mîzanseno ke serê çewt bikerî her çî hadre bî. La mi vat ez serê xo bironî zî ez do xover bida.” 

 

‘Mi xover da’

 

Berîvane da zanayîş ke polîsan bi israr hewl dayî ke eynî dîmenan biancî û wina dewam kerd: “Ma şîyî asayîşî. Polîsa cinî mi rê vat ma mede zorî ma zî to nêdanî zorî. Yanî vatêne ma sereyê xo ronenî ti zî vengê xo meke. La mi xover da. Nezaretxaneyan de zî wina kerdî. Vera heme israranê înan mi bi eks xover da.”

 

‘Azadî şikitişê tabuyan a’

 

Berîvane wina dewam kerd: “Cîyayeyê zîndanî yê teberî ra tena çar dêsî yo. Heme kar û gureye rojane sey yewbînan ê. Hetê azadîya fîzîkî de sînorkerdişî mana vînî kerdî. Azadîya esasî şikitişê tabuyan a. La vera îmkananê bi sînorî têkoşînê rêxistinkerde û embaztî xeylê muhîm o. Tecrubeyê muhîmî yenê destfînayîş. Xêrcê înan ma munaqaşa û analîzan kenê. Sewbîna hedîseyê sîyasî yê ke virazîyenê û rojane yenê taqîpkerdiş. Mi teber de nêeşkayêne biwana la mi zerre de wendiş newe ra da dest pêkerd.”

 

‘Verê ke ma bîyarê zîndan kawîşê ma hadre kerdbî’

 

Berîvane dîyar kerd ke wexto ke înan newe berdê zîndan cigêrayîşê zitî bi înan ser de ameyo ferzkerdiş û vat: “Verê ke ma berê kawîşan ma odeyêk de dayî vindarnayîş. Awe nêdayî ma. Heta ereyê şewe aw nêdayî. Ez xeylê xirab bîya. Dima ra awe ardî. Ma berdî kawîşê F-2. Yanî verê ke ma bîyarî zîndan kawîşê ma hadre kerdbî. Tîya de her çî bi pere yo. Prîzê kawîşan xebetîyenê. Seke priz nînê şuxulnayîş. Odeya muşahadeyî de payan ser de hûmartî, ferzkerdişê qertê nasnameyî zî binpaykerdişan ra yew o. Seba mase û kursîyan ma hewteyêk waştişname da. La înan zî reyêk de nêdayî. Ewil kursî dima ra zî mase ardî. Seba nameyê ke lîsteya pêvînayîşî de ca gênê zî astengîya ‘şikin’ ardî. Pêvînayîşê bi embazanê ma yeno astengkerdiş. Cewabê ke yenê dayîş zî sey bahaneyanê her wextî tê.”

 

‘Waştiş bîyo sîyasî’

 

Berîvane bale ant hadrenêkerdişê îdîanameyan ser û ard ziwan ke sebebê hadrenêkerdişê îdîanameyan no yo ke prosesê weçînayîşî de rojnamegerî tepişte bimanî û wina dewam kerd: “Coka ra ma nêpawenê ke îdîaname lez bêrî hadrekerdiş. Sewbîna zî no operasyonêk sîyasî yo û proses zî goreyê ci aver şino. Bifikirêne dadgero ke ma tepişt zî roja 18ine yê tepiştişê ma de waştişê tepiştişî kerd. Yanî muhakeme zî bîyo sîyasî.” 

 

‘Ma xoverdayîş tercih kerd’

 

Berîvane peynîya qiseykerdişê xo de nê çîyan vat: “Ez veng dana rojnameran ke hemverê hêrişanê çapemenîya azade de bêveng manenî; Seke Epîktetosî vato ‘Tu keso/a ke efendîyê xo nêbo/a azad nîyo/a’. Ez veng dana rojnamegeranê ke hemverê zextanê serê çapemenîya azade de bêgeng manenî. Eke wazenê tarîtîye de bimanî azadî ya înan a. Çapemenîya Azade bêveng nêmend û do bêveng zî nemana. Ez zî seba kedkaranê çapemenîya azade ke kalemanê ma erdî de nêverdayî rê spas kena.”