STENBOL - Sereka Konseya Merkezî ya TTByî Şebnem Korur Fîncanciye rê 2 serr 8 aşm û 15 roje cezaya zîndanî ameye dayîş û derheqê aye de qerarê tehlîkerdişî dîya.

 

Sereka Konseya Merkezî ya Yewîya Tabîbanê Tirkan (TTB) û Pispora Tibê Edlî Prof. Dr. Şebnem Korur Fîncanci seba ke waştbi hêrişê kîmyewîyî yê başûrê Kurdistanî bêrê cigêrayene hetê AKP-MHPyî ra hedef ameye mojnayîş û 27ê teşrîna verêne de amebî tepiştene. 3ine roniştişê dewaya aye ke bi îdîayê ‘propagandaya rêxistine kerda’ ameyêne muhakemekerdiş 24ine Mehkemaya Cezaya Girane ya Çaglayanî ya Stenbolî de ame dîyîş.

 

Heyete mehkema bado ke maben da qerarê xo eşkera kerd û qerar da ke Şebneme rê sucê ‘propagandaya rêxistine’ ra 2 serr 8 aşm û 15 roje cezaya zîndanî bêra dayîş û sewbîna derheqê aye de qerarê tehlîkerdişî daye.