ANQARA - Nobeta Edaletî ya wekîlanê HDPyî vera tecrîdî dewam kena. Wekîlan vat: “Seba çareserîya demokratîke ganî cade Birêz Abdullah Ocalanî de pêvînayîş bêro kerdene.”

 

Nobeta Edaletî ya wekîlanê Partîya Demokratîke ya Şaran (HDP) vera tecrîdê Îmraliyî roja 15. de dewam kena. Wekîlî Kemal Bulbul, Abdûllah Koç, Mûazzeze Orhan, Siddik Taş, Huseyîn Kaçmaz, Erdal Aydemîr, Kemal Pekoz, Celadet Gaydali, Remziye Tosûn û Nûrane Îmîr bi dowîzanê 'Wa huqûq Îmrali de bêro caardene' û 'tecrîd sûcê vera merdimatîye yo' ver bi Berê Dîkmenî yê Meclîsî şîyî.

 

Wekîlê HDPyî yê Antalya Kemal Bulbulî eşkerayîye wende û ard ziwan ke Girawa Îmraliyî de huqûq çin o û AKP-MHP bi tecrîdî sûcî kenê. Kemalî vat: ''NATO, CPT, Yewîya Ewropa û MHME hetê nê sûcî yê. Yewîya Ewropa derheqê tecrîdê Îmraliyî de çîyêk nêvana. Rayaumûmîye, şarê kurdî û HDP seba weşîya Ocalanî qerqilîyenê."

 

Kemalî dewam de bale ant serê tecrîdî û vat: "Vervejîyayîşê tecrîdî yeno manaya pawitişê demokrasî, heqanê merdiman, azadîye, têdûştîye û edaletî. Birêz Ocalanî tim Îmrali de bi fikr û projeyanê xo cuya azade pawite. Pawitişê înan sûc nîyo. Tecrîd sûc o. Seba çareserîya demokratîke ganî cade tecrîd bêro wedaritene û Birêz Abdullah Ocalanî de pêvînayîş bêro kerdene.”