RIHA - Çalakîya Nobeta Edaletî ya keyeyê Şenyaşarî dewam kena. Keyeyî seba roniştişo ke do 17ê çeleyî de bêro kerdiş, venga tewrbîyayîşê parlamenterê AKPyî kerd û wina vat: “Wa bêrê û şahidan ra goşdarî bêkerê ka embazanê înan qirkerdişêk senîn kerdo.”

 

Merdim û pawitoxê Parlamenterê AKPyî Îbrahîm Halîl Yildiz 14ê hezîrana serra 2018ine de hêrişê dikanê keyeyê Şenyaşarî yê Pirsûsî yê Rihayî kerd. Netîceyê hêrişî de mêrde û 2 lajê dayîka Emîne Şenyaşare ameyî qetilkerdiş. Emîne Şenyaşar û lajê ci Ferît Şenyaşar ke qirkerdiş ra bi birîndarî xelisyabî, 9ê Adara 2021ine de vernîya Edliyeyê Rihayî de dest bi Nobeta Edaletî kerdî. Çalakîya keyeyî roja 676ine de dewam kena. Emîne Şenyaşare û Ferît Şenyaşar vernîya edlîye de pankartê xo daliqnayî û nobete girewtî.

 

Ferît Şenyaşarî çalakîye de dîyar kerd ke pêro kesê qalê huqûq û edaletî kenê bêrê vernîya Edlîyeyê Rihayî û wina vat: “Temamê şarê Rihayî dejê dayîka mi anceno. Oyo ke qirkerdiş pê ard, parlamenterê partiîya îktîdarî yo. No parlamenter hetê Serekkomarî ra yeno pawitiş. Temamê şarê Rihayî zî şahidê nê qirkerdişî o. AKP seranserê Tirkîya de reyan vînî keno. Do tewr zêde zî Riha de vînî bikero. Ma heqdar ê û waştişê ma waştişêk huqûqî yo. Ma nobeta xo çarçewaya sînorê huqûqî de dewam kenê.” 

 

Bi domdarî Ferîtî dîyar kerd do qirkerdişê nêweşxaneyî do 17 çeledî de Meletî de bêro kerdiş û wina vat: “Ma paweyê ke pêro temsîlkarê partîyê sîyasî ke rêziknameyê partîya înan de qalê edaletî yeno kerdiş, bêrê Meletî. Parlamenterê îktîdarî zî mîyan de, wa parlamenterî bêrê û şahidanê fermî goşdarî bikerê ka hevalbendê înan qirkerdiş senîn kerdo.”