Melek Avci

 

ANQARA – Parlamentera APyî Evîn Încîre hêrişê hemverê her çar parçeyê Kurdistanî ercnaye û bêvengîya hemverê hêrişan yê Tirkîya rexne kerd û vat: “Eke Kurdan hemverê DAIŞî de têkoşîn nêdayêne do DAIŞ xo rê Ewropa de zemîn qezenc bikedêne. Têkoşînê Kurdan eynî wextî de pawitişê merdimîye û demokrasîye yo.”

 

Bajarê Strasbourgî yê Fransaye de endamên Parlamentoyê Ewropa (AP) aşma kanûne de kombîyayîşêk pê ardî û hêrişanê Tirkîya yê vera Vakur û Rojhelatê Sûrîye û Başûrê Kurdistanî ercnayî.

Parlamentera Swêdî Evîn Încîr û komêk parlamenterî waştî ke ‘Rojawan de herêma qedexe ya firayîşî’ bêra awankerdiş. Sewbîna vatî ke ganî ambargoya çekan seba Tirkîya pê bêra û veng dayî Ewropa ke bikewê têgêrayîş mîyan. Evîn Încîre derheqê waştiş û hêrişanê Tirkîya de JINNEWSî rê qisey kerd.

 

Waştiş ame resnayîş

 

Evine ard ziwan ke waştişî ameyî resnayîş û wina vat: “Çalakîyê Erdoganî binpaykerdişê huqûqê mîyanneteweyî yê. Komelê mîyanneteweyî bêveng o. Na bêvengîye nîna qebulkerdiş. Ma tu hewldayîşan nêdê. Mi waştêne ke reaksîyonanê zêdeyan bivîna. Aşma Kanûne de Parlementoyê Ewropa de kombîyayîş pê ame û hêrişanê Tirkîya girîya dest. Ma waşt ke raşteyê hewayî bêro girewtiş. Embazê ma heqê qiseykerdişî girewtî û rexne kerdî. Pêşnîyazanê xo ardî ziwan. Pêvînayîşê parlementoye de hema hema her kes heqanê Kurdan pawit. Vatî ke ganî Ewropa bikewo têgêrayîş mîyan. Her kes vat ganî bombardumanê Başûr û Rojawanî bêrî vindarnayîş. Kurdan hemverê DAIŞî de têkoşîn rayra berd. Eke Kurdî hemverê DAIŞî de têkoşîn nêdayêne do DAIŞ xo rê Ewropa de zemîn qezenc bikerdêne.” 

 

‘Kes huqûqê mîyanneteweyîye ra berzêr nîyo’

 

Evîne sewbîna bale ante waştişo ke ganî herêma firayîşî rê qedexe bêra îlankerdiş û ambargoya çekan bêra ronayîş ser û wina dewam kerd: “Ganî hemverê raybazanê huqûqanê mîyanneteweyîye de rêzdarî bibo. Ganî Tirkîya peynîya hêrişanê hemverê Kurdistanî bîyara. Ya bîn zî ambargoya çekan a. Ganî bombarduman bêrî vindarnayîş û hemverê huqûqê mîyanneteweyîye de rêzdarî pê bêro. Ganî destur seba hêrişanê Tirkîya nêro dayîş. Seba ke tarîx xo dibare nêkero gamê şênberî ferz ê.”

 

‘Ganî eynî reaksîyon seba Tirkîya zî bêro mojnayîş’

 

Evîne qala bêvengîya raşteyê komelê mîyanneteweyîye kerd û na babete de zî wina vat: “Na bêvengîye seba Tirkîya bi fêde yo. Nika Tirkîya çimsûrîya Rûsyaye ya hemverê Ukraynaye ra fêde gêna. Coka ra zî Yewîya Ewropa hemverê zalimtîya Rûsyaye de senî têgêrena ganî hemverê zalimtîya welatanê bînan de zî eynî reaksîyon bêro mojnayîş. Ê heme yewbînan ra miqate benî û girêdayeyê yewbînan î.”

 

‘Umudina ke hukmatê Tirkîya bibedelîyo’

 

Evîne babeta weçînayîşo ke vernîya Tirkîya de esta de wina vat: “Umudina ke hukmatê Tirkîya bibedelîyo. Ez hêrişanê sîyasî yê Erdoganî rexne kena. Ma paştî nêdanê Erdoganî. La mad anî HDPyî. Çend rojê verê cû hesabê HDPyî dîyayî vindarnayîş û blokekerdiş. Nika deayê girewtişî yê HDPyî ameyî akerdiş. PE hêrinanê hemverê HDPyî bi çend vatişan şermizar kerd. Tepiştişê sîyasetmedaran şermezar kerd. Komelo mîyanneteweyî rewşa Tirkîya ra fikarin o. Umudina ke hukmat bibedelîyo.”