ÎZMÎR - Grevê vêşanîye yê Zîndanê Cinîyan ê Şakranî dewam keno. Avûkate Şukran Ozturka ke bi tepişteyan reyde pêvînayîş kerd, dîyar kerde ke zîndan de xeylêk binpaykerdişê heqan estê û vat: "Tepişteyan dîyar kerd ke ganî vengê înan hetê rayaumumî ra bêro eşnawitiş."

 

Bi amancê tecrîdê serê Rayberê PKKyî Abdullah Ocalanî û tecrîdê serê tepişteyan peynî bibo, sewbîna bi amancê bale ancenê serê binpaykerdişê heqan û hûmartişê serê lingan Zîndanê Cinîyan ê Şakranî de 2yê çeleyî de tepişteyan dest bi grevê vêşanîye ya 10 rojan ê dore kerdî û grev dewam keno. Vernê de tepişteya bi nameyê Leyla Saraçe grev da destpêkerdiş û 12 çeleyî de Hedîye Oztekîne dewr girewt. 

 

Hemsereka Komeleya Huqûqnasê seba Azadîye (OHD) ya Îzmîrî avûkate Şukran Ozturk ke bi tepişteyan reyde pêvînayîş kerd, dîyar kerd ke tepişteyan vato ke caardişê ke rumetê merdiman şiknenê, hûmartişê serê llingan eşkeno açaryo binpaykerdişê heqê cuye.

 

‘Serê lingan de hûmartiş yeno ferzkerdiş'

 

Şukrane da zanayîş ke caardişê kêfî yê îdarî her sewîye de vejêno vernîya tepişteyan û wina vat: "Tepişteyan waşt ke nê caardişî peynî bibê. Bi taybetî demê peyîn de hûmartişê serê lingan de yeno ferzkerdiş. Pêwa ke tepişteyan dîyar kerd ke no rumetê merdimayî şikineno, binpaykerdişê heqî yê hemverê cuye yo zî bi israr yeno ferzkerdiş. Seba nê zî tepişteyan qerarê grevî girewtî."

 

‘Xeylêk binpaykerdişê heqan estê'

 

Şukrane dewam de wina vat: “Tena nê babetî nê, xeylêk binpaykerdişê heqan babeta vatişî yê. Xoresnayîşê dermankerdişî hema problem o û bi astengîyan reyde yenê rî bi rî. Heqê perwerdeyî, xoresnayîşê kitaban, rojnameyan hema zî bi problem ê. Tepişteyan dîyar kerdî ke ganî vengê înan rayaumumî ra bêro eşnawitiş."

 

‘Binpaykerdişî beno ke zêde bibê'

 

Şukrane vat, hûmartişê serê lingan bi bahaneyê pandemî reyde ameyo ferzkerdiş û vat: “Tecrîdê serê Birêz Ocalanî û heme zîndanan bi bahaneyê pandemîyî reyde dest pêkerd. Tepişteyan dîyar kerd ke binpaykerdişî sewîyeya tewr corî de yê û eşkenê hîna bêrê zêdekerdiş û coka dest bi grev kerdê. Tepişteyî nêeşkenê waştişname bidê. Nêresenê muxatabanê xo. Nêeşkenê waştişnameyê xo taqîb bikerê. Îdare cewab nêdano tu waştişnameyî."

 

‘Seba rayaumumî vengdayîş'

 

Şukrane tewr peyîn qiseykerdişê xo de bale ant serê venga tepişteyan ê seba rayaumumî û wina qedêna: "Tepişteyî wazenê nê hewldayîşê înan ke bênetîce yenê verdayîş bêrê taqîbkerdiş û çareserî pê bêro. Xora seba Komîsyonê Heqê Merdiman ê  Meclîsî û Kontrolê Îstîmlakî de waştişname ameyê waştiş. La derheqê ke waştişname yenê teqîbkerdiş yan nê tu agahî çin a."