COLEMÊRG - Raybera Şûbeyê ÎHDyî Pinar Yilmaza ke derheqê grevê vêşanîye ke hetê tepişteyan ra hemverê binpaykerdişê heqan yê zîndanan de dîyayo dest pêkerdiş û tecrîdo girankerde de qisey kerd û vat: “Nika ke tepişte dinyaya xo nêbedelnayî ganî gam bêro eştiş.”

 

Zindanan de îşkence û binpaykerdişê heqan her ke şino zede beno û tepişteyî yene kiştiş. Goreyê dayeyanê Komeleya Haqanê Merdiman (ÎHD) zîndanan de tewr tay hezar û 17 tepişteyê nêweşî estî ke înan ra 651 tenî nêweşê giranan ra yî. Hemverê binpaykerdişê heqan û tecrîdo girankerde yê zîndanan de xeylê tepişteyî kewtî grevê vêşanîye. Rayîrbera Şûbeyê ÎHDyî ya Colemêrgî Pinar Yilmaze bale ant rewşa zindana ser.

 

‘Tepişteyê nêweş yê giran pê kelemce yenê muayenekerdiş’

 

Pinare ard ziwan ke binpaykerdişê heqan tena bi tay zîndanan sînorkerde nîyo û bale ant grevê vêşanîye ke seba nê binpaykerdişan dîyayo dest pêkerdiş ser û wina vat: “Sozde wezîrê edaletî yo ke binpaykerdişê heqan ra berpirsîyaro esto û serrane pêronemeyêk vejeno. La rayîrberê zîndanan seba ke nê pêronameyan esas gênî, xo sey şefe zîndanan dane mojnayîş û bı hawayêk bêhuqûqî têgêrenî. Rewşa tepişteyanê nêweşan yê zîndanan diyar a. Tewr peynî tepişteyêk qezaya Geverî ya Colemêrgî de dinyaya xo vînî kerd. Tepişteyê ke rewşa înan giran a zî pê kelemçe nêweşxaneyan de yenê dermankerdiş. No binpaykerdişê heqan o. Tepişteyê nêweşî zîndanan de dinyaya xo vînî kenî. Zîndanan de merdime 70-80 serrî estî û seba înan gamêk nîno eştiş.”

 

'Pêroyê Tirkîya de tecrîd esto'

 

Pinare vatişê ‘Nika pêroyê Tirkîya, Îmrali ra heta heme zindana tecrîd esto’ ard ziwan û wina dewam kerd: “Rayberê PKKyî Abdullah Ocalan û 3 kesê bînî yê ke Îmrali de yî ra xeber nîna girewtiş. Cezaya dîsîplînî timî dîyena înan û heqê înan bi bahaneyê cîyayan destê înan ra yenê girewtiş. No qedexe hemverê heqanê merdiman de yo. Wezîrê Edaletî, dozger û dadgerî zî zanê, la her çend ke bizanî zî binpaykerdişê heqan domnenî. No mojneno ke qanûn kam cû merhela de yo.”

 

'Ganî binpaykerdişê heqan bêro vindarnayîş’

 

Pinare da zanayîş ke seba tepişteyanê ke grevê vêşanîye de yî dinyaya xo vînî nêkerî ganî gamêk bêro eştiş û vat: Heta ke zext, zilm û binpaykerdişê heqan yê zîndanan peynî nêbî do tepişteyî fek grevê vêşanîye ra vera nêdî. Hemverê binpaykerdişan de gamêk şenik daxî nîno eştiş. Rîze Kalkanredeyî ra heta Zîndanê Colemêrgî binpaykerdişê heqan roj bi roje zêdîyenî. Lazim o Wezîrîya Edaletî seba vernîgirewtişê nê binpaykerdişan gamêk bierzo. Ganî demêk lez de binpaykerdişî bêrî vindarnayîş û seba baleantişê şert û mercê zîndanan gamî bêrî eştiş. Tu tepişteyêk zî merg, îşkence û binpaykerdışî heq nêkeno.”