WAN - Cinîyan dîyar kerd ke malumat Rayberê PKKyî Abullah Ocalanî ra nîno girewtiş û vatî ke keseka çareserîye Îmrali ya û bale antî muhîmîyan têkoşînî ser.

 

Rayberê PKKyî Abullah Ocalanî 15ê Sibata 1999î ra nata Zîndanê Asayîşo Berz yê Îmraliyî de binê tecrîdo girankerde ke yeno tepiştiş. 2 serrî yo ke malumat nîno girewtiş. Cinîyê Wanî derheqê tecrîdî de ercnayîşanê xo ardî ziwan ser û seba şikitişê tecrîdî vengê têkoşînî kerdî.

 

‘Heta ke tecrîd nêwedarîyo asayiş zî çin o’

 

Behîce Abîye da zanayîş ke no di serrî yo ke tecrîdêk girankerde serê Rayberê PKKyî Abullah Ocalanî de yeno rayraberdiş û wina vat: “Ganî na polîtîkaye bî lez bêra peynîardiş û Abullah Ocalanî ra xeber bêra girewtiş. Heta ke tecrîd nêwedarîyo asayiş zî çin o. heta ke tecrîd nêwedarîyo aştî zî pê nîna. Wexto ke pêvînayîş bi Birêz Ocalanî reyde ameyêne kerdiş welat asayîş de bî. Cenaze nêameyêne. Dayîk nêbermayêne. Merdiman de umudê aştîye awan bîbî.” 

 

‘Ma hesretê aştîye cuyenî’ 

 

Behîceye vat ke ê dewlete ra çîyêk nêpawenê, tena aştî, asayiş, kultur û ziwanê xo wazenê û wina dewam kerd: “Ma qesran nêwazenê, ma mal û milk nêwazenê. Ma tena aştîye wazenê. Ma şer nêwazenê. Di serrî yo ke Birêz Ocalanî ra xeber nîna girewtiş. La rayîro yewine yê çareserîya probleman Abdullah Ocalan o. Keseka aştîye Abdullah Ocalan o. Bi tecrîdê serê Ocalanî hewl danê şarî bigecilnî. Sebebe tecrîdî yê yewine çinîkerdişê şarî yo. La wa baş bizanî ke şarê Kurd do tepîya gamêk nêerzo. Şarê Kurd nasnameyê xo ziwan û kulturê xo wazeno.”

 

‘Têkoşînê ma seba azadîya Birêz Ocalanî yo’ 

 

Hemsereka Komeleya Paştîdayîşê Keyeyanê Tepîşteyan (TUHAY-DER) Edîbe Babure zî bale ant tecrîdo girenkerde ser û ard ziwan ke tecrîd tesîrê xo heme tepişteyan û şarî ser de kerdo û vat: “Ganî bi lez Abdullah Ocalan azad bibo. Ma wazenê demek kilm de mîyanê ma de bo. Têkoşînê ma seba ci yo. Abdullah Ocalan pê komployêk teslîmê Tirkîya ame kerdiş. Aye roje ra nata binê tecrîdî de yo. pêvînayîş nînê kerdiş. Zîndanan de zî tecrîd esto la Îmrali de yê tewr gird pê yeno. Ganî sey her kesî Birêz Ocalan zî bireso azadîya xo ya fîzîkî.”