Rozerîn Gultekîn

 

STENBOL - HDK 29ê Çeleyî de bi sloganê, 'hemverê faşîzm û binpaykerdişî ma meclîsê demokratîkî de bêrê têhet' şino  12ine Heyetê Pêroyî. Verfeka HDKyî Esengul Demîr vernîya heyetê pêroyî de qisey kerd û vat, do heyet bibo cewabê polîtîkayê tecrîd û şerî.

 

Kongreya  Demorkatîke ya Şaran (HDK) 29ê çeleyî de bi sloganê, 'hemverê faşîzm û binpaykerdişî ma meclîsê demokratîkî de bêrê têhet' Merkezê Kongreyê Stenbolî yê Harbiye de do 12ine Heyetê Pêroyî yê pê ard. Heyetê Pêroyî de do hemverê polîtîkayê şerî û feqîrî têkoşîn bêro berzkerdiş û sewbîna do seba demê neweyî xerîteyarayîrî bêra dîyarkerdiş.

 

Verfeka HDKyî Esengul Demîre vernîya heyetî de ajansê ma rê qisey kerd.

 

Hedef xurtkerdişê rêxistinbîyayîşî yo

 

Esengule vat, HDK 2021ine de heyetê 11ine pandemî de pê ardo û o wext ra heta nika xeylêk vurnayîşî bîyê û vat: "HDK nê prosesî de problemê şarî nêzdî ra taqîb kerd. Ma prosesê xorexnekerdişî zî pê ard. Ma xeylêk babetan munaqeşe kerd. La babeta ke HDK lazimîyêk o, nêvurya yo. Hedefê ma yo demê bêro oyo ke kêmî bêrê çareserkerdiş û rêxistinbîyayîş bêro xurtkerdiş."

 

‘Meclîsê ma sey tehluke yenê vînayîş'

 

Esengule dîyar kerd ke amancê meclîsî HDKyî de ca gênê oyo ke kerdoxî awanbîyayîşê demokratîke de çalak ca bigîrê û wina vat: "La meclîs hetê sîstemî ra tehluke yenê vînayîş. Roja ke Komara Tirkîye ameya awankerdiş, heta nika sey ke wayîrê na dewlete tirk ê, yenê vînayîş. Şarê bînî çin yenê hesibnayîş û yenê cîyakerdiş. Seba nê zî meclîsê ma protîpê yewpawitoxî lerznenê."

 

Şinê heyetê 12ine

 

Esengule bale ant serê têduştî û wina dewam kerd: "Ma HDK bi girseyî 29ê çeleyî de şinê heyetê 12ine. Ma hewl danê bi heyetê têduştî pê bîyarê, meclîsê demokratîkî xurt bikerê. Hedefê ma yê cuya newe, do newe ra heyetê pêroyî de bîyarê ziwan. Prosesêk ke teda û tepişteyî zêde yê, ma şinê heyetî. La no teda bi ma peyser nêdanê eştiş. Heyetê ma do bibê cewabê tecrîdî, polîkayê şerî, feqîrî û demê tarî. Ganî wayîrê heyetî bêro vetiş. Ez venga pêro şaran kena ke tewrê heyetê 12ine bibê."