RIHA - Keyeyê Şenyaşarî ke têkoşînê xo yê edaletî dewam keno, reaksîyon vera redkerdişê Pêşnîyaznameyê Cigêrayîşî yê derheqê qirkerdişî Nêweşxaneyê Dewlete ya Pirsûsî kerd.

 

Merdim û pawitoxê Parlamenterê AKPyî yê Rihayî Îbrahîm Halîl Yildiz 14ê hezîrana serra 2018ine de Pirsûsê Rihayî de hêrişê keyeyê Şenyaşarî kerd. Netîceyê hêrişî de mêrde û di lajê ci ameyî qetilkerdiş û lajê ci Ferît Şenyaşar ke bi birîndarî qirkerdiş ra xelisya, 9ê adara serra 2021ine de vernîya Edliyeyê Rihayî de dest bi çalakîya Nobeta Edaletî kerdibî. Çalakîya keyeyî roja 685ine de dewam kerd. Peynîya hewteyî de berê edliyeyî padeye yo, coka keyeyî nobeta xo banê xo yê Pirsûsî de dewam kerd.

 

Derheqê babete de keyeyî serê hesabê xo yê medyaya dîjîtale de nê pare kerd: "HDP meclis de seba qirkerdişê Nêweşxaneyê Dewlete ya Pirsûsî Pêşnîyaznameyê Cigêrayîşî da. Redkerdişê nê pêşnîyaznameyî bêwijdanî yo. Pawitişê kesê sucê hemverê merdimayî kerdişî yo. Ma seba welatêk merdim bieşko biciwîyo, waştişê edaletî kenê."