WAN - Xoverdayîşê Îranî ke qetilkerdişê Jîna Emînîye ra dima dest pêkerdib dewam keno. Cinîyan dîyar kerdî ke do bi felsefeya ‘jin jiyan azadî’ paştdayîşî gird bikerî.

 

Paytextê Îranî Tehran de 13ê Êlula 2022î de cinîya ciwane Jîna Emînîye ya kurde bi îşkence pê bahaneye porê aye asayêne hetê polîsanê ‘exlaqî’ ra ameye destbendkerdiş û 16ê êlule de bi îşkence ameye qetilkerdiş. Çalakîyanê protestokerdişî ke sloganê ‘jin jiyan azadî’ tede berz bî hema zî Rojhelatê Kurdistan û bajaranê Îranî de dewam kenê. Xeylê hemwelatîyî seba ke paştî danê serewedarnayîşî yenê hedefgirewtiş, qetilkerdiş, daliqnayîş, destbendkerdiş û tepiştiş. Cinîyê Wanî ke bajarê sînor yê rojhelatê Kurdistanî de cuyenê derheqê babete de ajansê ma rê qisey kerdî.

 

‘Ma paştî danê serewedarnayîşê Rojhelatî’

 

Îdarekara Komeleya Cigêrayîşê Koçberîye ya Serhedî  (Serhat GOÇ-DER) Ayten Kirane da zanayîş ke qetilkerdişê Jînaye ra dima serewedarnayîş dîyayo dest pêkerdiş û no serewedarnayîş hêzê têkoşînî yê cinîya Kurde reyna mojna yo û wina vat: “Zîhnîyeto serdest cinîyan ra terseno. Rejîmê Îranî de heta nika xeylê bêhuqûqî ameyî cuyayîş. Jîna Emînîye seba ke porê aye asayêne ameye qetilkerdiş. No bêhuqûqîyê Îranî mojneno. Serewedarnayîşo ke Jînaye ra dima dest pêkerd bi serkêşîya cinîyan dewam keno. Heme dinya de cinî bi şîdetê camêrd-dewlete reyde rî bi rî manenê. Bi taybetî cinîyê kurdî benê hedefe hêrişan. Çike zanê ke cigêrayîşê têkoşîn û azadîye yê cinîyan kurde esto. Se bibo wa bibo do cinîyê kurdî têkoşînê xo ra fek vera nêdê. Ma zî paştî danê serewedarnayîşê Rojhelatî.”

 

‘Felsefeyê Birêz Ocalanî dinya de veng dano’

 

Endama Meclîsê Partîye (PM) ya HDPyî Sarya Bîlîcîye zî dîyar kerd ke emserr her cayê dinya de serewedarnayîşê cinîyan gird bî û proseso ke Îran de yeno cuyayîş tesîrê xo pêro dinya ser de kerd. Saryaye wina dewam kerd: “Îqtîdar bi taybet têgêrayîşê cinîya kurde ser de polîtîkayanê şerî pê ano. Îqtîdar her raşteyê cuye de cinîyan hedef gêno. Hewl danî cinîyan bikerê mîyanê çar dêsan. Felsefeyê  ‘jin jiyan azadî’ yê Birêz Ocalanî seba ma cinîyan bî felsefeyê cuye. Bi saya cinîyê kurdî no slogan dinya de bî vila. Dewleta Îranî hemverê serewedarnayîşê Îranî de hêrişan domnena. La nê hêrişî serewedarnayîşî peynî nêkenê. Se beno wa bibo ma do seba azadîye têkoşîn bidê.”

 

‘Serewedarnayîşê cinîye açarîya serewedarnayîşê şarî’ 

 

Hemsereka HDPyî ya qezaya Tuşbaye Hanim Akkuşe bale ant serewedarnayîşo ke bi serkêşîya cinîyan Rojhelatî de dest pêkerd û tedayan ser û wina vat: “Seba ke serewedarnayîş bêro çinkerdiş dewleta Îranî hewldayîşêk gird dana. Vera hende tedayana zî şar gamêk tepîya nêerzeno. Şar serewedarnayîşî de bi israr o. Serewedarnayîşê cinîye açarîya serewedarnayîşê şarî. Se beno wa bibo do cinîyî têkoşînê xo dewam bikerê.”