ANQARA - Parlamenterê HDPyî Alî Kenanoglû ke çalakîya hemverê tecrîdî yê 23 rojî peyê xo de verdayî û vat: “Ma tecrîdo ke yeno girankerdene tena serê kesêk de nêvînê, sey zulmê şarê kurdî rê yeno kerdene û tesîrê xo serê temamê komelî keno.”

 

Nobeta Wekîlanê HDPyî ya vera tecrîdê serê Rayberê PKKyî Abdullah Ocalanî 23 rojî xo pey de verdayî. Ewro wekîlî Alî Kenanoglû, Zeynel Ozen, Şevîn Coşkûn, Mûrat Sarisaç, Kemal Pekoz, Erdal Aydemîr, Mûrat Çepnî, Celadet Gaydali, Abdûllah Koç û Habîp Eksîk tewrê çalakîye bîye.

 

Alîyî nameyê wekîlanê bînan ser o eşkerayîye wende û vat: ''Tecrîd îzolasyon o. Tepişteyî wayîrê heqanê pêvînayîşî yê. Pê tecrîdî heqê tepişteyan yeno binpaykerdene û no zî sûcêko huqûqî yo. Îmrali de sûcê vera merdimatîye yeno kerdene. Tecrîd heman wextî de îşkence yo. Îmrali de vera Birêz Ocalanî û tepişteyanê bînan îşkence yeno kerdene. Pê tecrîdî çareserîya meseleya kurdan yena astengkerdene. Seba ke Tirkîya aram biba ganî tecrîd bêro wedaritene. Ganî verê pêvînayîşanê bi Ocalanî nêro girewtene.''

 

Alîyî ard ziwan ke tecrîd goreyê qanûnan û Qanûnê Bingeyî sûc o û ganî cade bêro wedaritene. Alîyî waşt ke wa cade keye û avûkatî bieşkê şorê Îmraliyî û Abdullah Ocalanî bivînê.