ŞIRNEX - Roniştişê yewine yê dewaya Ahmet Babato ke Fîrdevs Babate qetil kerdbî do siba bêro dîyîş. Avûkatanê dosyayî ra Hedîye Gokçe Baykale derheqê dewaye de qisey kerd û vat: “Ma do heta peynîye dewa taqîp bikerî ke kiştox û kesê ke hetkarî kerdî merheleya tewr corî de bêrê cezakerdiş.”

 

Fîrdevs Babata 17 serrî 18ê tebaxe de Qilêban de vînî bibî. Bajarokê Sêgirkê yê qezaya Qilêbanî ya Şirnexî de cenazeya Fîrdevs Babate kişta Çemê Hêzilî yê 15 kîlometreyan dûrê qezaye de mabenê di kerrayan de ameybî dîyîş. Eşkerabîyayîşê qewimîyayîşî ra dima Ahmet Babatî ameybî destbendkerdiş. Ame zanayîş ke Fîrdevs Babate pê çekê qorîcî Ramazan Babatî ke birayê Ahmet Babatî yo ra ameya kiştiş.

 

Goreyê raporê otopsî yê vernî îşkence bi Fîrdevse ameya kerdiş û dima ra pê çekî ameya qetilkerdiş. Sewbîna raporê otopsîyî de ame vatiş ke serê laşê aye de birîn û rêçê hêrişê cînsî zî ameyî tespîtkerdiş. 

Ahmet Babato ke çarçeweya tehqîqatî de ameybî destbendkerdiş bi îdîayê ‘tute bi zanayîş kişto’ ra ame tepiştiş. Serdozgerîya Komare ya Qilebanî ke raporê sucê ‘Bi zanayîş kiştişê tute’ temam kerd, seba dewaye Serdozgerîya Komare ya Şirnexî rê şirawit. Roniştişê yewine yê kiştox Ahmet Babatî do siba 3ine Mehkemaya Cezaya Girane ya Şirnexî de bêro dîyîş. Sewbîna avûkatê Mudirîyeta Keye û Polîtîkayê Komelî yê Şirnexî zî do tewrê roniştişî biba.

 

‘Vatişê versucî pêro bi nakokî yê’

 

Komeleya Verê Her Çî Tutî û Cinî ra Hedîye Gokçe Baykala ke avûkatanê dosyayî ra yew a derheqê dewaye de qisey kerd. Hediyeye dîyar kerd ke dosya de xeylê babetê ke nêameyî cigêrayîşkerdiş estî û wina vat: “Fîrdevs hema 17 serre bî, bi bahaneyê cîyayan yê sey senaryoyî ameye qetilkerdiş. Vatişê versucî pêro bi nakok ê û hewl dano ke xo suco ke kerdo ra bixelesno. Dosya de xeylê perse ke nêameyî cigêrayîşkerdiş estê. Seba zelalkerdişê înan çi destê ma ra bêro ma do bikerê. Îdîanameyî de qala plankerdişê sucî nêameyo kerdiş. La versuc îfadeyê xo de vano ke qewîmîyayîş ra ver o şîyo keye û çek girewto. Nê îfadeyî ra ver hadrekerdişê îdîanameyî hetê dozgerî ra nîno qebulkerdiş.”

 

Vengê paştîdayîşî

 

Hedîyeye seba wayîrvejîyayîşê dewaye vengê paştîdayîşî daye û vat: “Ma do heta peynî dewaye taqîp bikerê ke versuc û kesê ke hetkarîya ci kerdî merheleya tewr corî de bêrî cezakerdiş. Kesê herême dîyar kernê ke versuc verê cû zû hemverê cinî û tutan de sucan kerdo. Ganî heme dezge û platformê cinîyan wayîrê dewaye bivejîyî û her hetî ra paştîdayîş bêro dayîş.”