STENBOL - Meclîsê Cinîyan yê HDPyî bi sloganê ‘Serewedarnayîşê ma hemverê serdestîya camêrdî yo, israrê ma cuya seyyewbînan û azade yo’ do 12. Konferansê Cinîyan yê Pêroyî pê bîyaro. Endama Meclîsê Cinîyan yê HDKyî konferansî ra ver veng da cinîyan ke paştîdayîşî gird bikerê.

 

Meclîsê Cinîyan yê Kongreyê Demoratîke (HDK) 28ê Çeleyî de bi sloganê ‘Serewedarnayîşê ma hemverê serdestîya camêrdî yo, israrê ma cuya seyyewbînan û azade yo’ do 12ine Konferansê Cinîyan yê Pêroyî pê bîyaro. Cinîyî do konferans de serê raybazanê neweyan yê têkoşîn, pêşnîyar û aştîya seba komelbîyayîşî de munaqaşayan rayra bibo. 

 

Endama Meclîsê Cinîyan û endama Heyetê Rayîrberîya HDKyî Belgîn Koçe derheqê têkoşînê cinîyan ke berz beno û muhîmîya meclîsan ya nê têkoşînî de ajansê ma rê ercnaye.

 

‘Têkoşînê azadîye seba komelî bî îlham’

 

Belgîne da zanayîş ke cinîyan hemverê zext û şîdetî de bi rêxistine reyde têkoşîn awan kerdî û têkoşînê azadîye yê cinîyan tesîrê xo pêro komelî ser de kerd. Belgîne wina dewam kerd: “Cinîyê ke tewrê têkoşînî bîyî seba şaran bîyî çimeyê îlhamî. Ma Îran de nimuneyê ci dî. Cinîyî tepîya gam nêeştî û cesaret dayî komelî. Rojawan zî eynî çî pê ame. Seba cinîyê dinyaye bîyî nimune. Sudan, Şîlî de têkoşînê cinîyan bî hewnê tersî yê patrîarkayî.”

 

‘Çim têkoşînê cinîyanê Kurdî de yo’ 

 

Belgîne bale ant têkoşînê cinîya Kurd ser û eşkera kerd ke cinîyê Kurd bi serran o pê sloganê ‘Jin jiyan azadî’ têkoşîn rayra benî û qetilkerdişê cinîya Kurd Jîna Emînîye ke hetê rejîmê Îranî ra ameye qetilkerdiş ra dima pêro dinya de cinîyî pê nê sloganî têkoşîn dayî û bala heme kesî nika serê têkoşînê azadîye yê cinîyan Kurde yo.  Belgîne wina dewam kerd: “Meclîsê cinîyan ke binê banê HDKyî de awan bîyo hetê sîyasetê welat û têkoşînê cinîye de xeylêmunîm o. No tesir pêro komelî ser de kenoç seba cuyêk newe fikrê esasî no yo.”

 

Xebatê meclîsî

 

Belgîne qiseykerdişê xo yê peyênan de derheqê Konferansê Cinîyan yê Pêroyî ke 28ê Çeleyî de pê ame de ercnayîşan kerd û vat ke konferansê 2021î ra nata xebat yenê rayraberdiş û wina qedênaye: “Netîceyê ke konferansî de vejîyayî ra dima panelî virazîyayî. Marmara, Ege, Anatolyaya Mîyanen û Behra Sîya de xebatê atolyeya ‘îfadeyê cinîyî esas o’ pê ameyî. Ma hewl da ke ma têkoşînê cinîyan de ca bigêrî. Seba aştîya komelî ma sey meclîsê cinîyan hewl danî. Konferansê ma hemverê serdestîya camêrdî de pê ame. Hêrişê hemverê têkoşînê cinîyan dewam kenî. Seba nê çîyî ma vatişê ‘ma bi israr î’ tercîh kerd. Ez veng dana pêro cinîyan ke tewrê konferansê ma bibê.”