ÎZMÎR - Endama Komîsyonê Koçberîye ya HDPyî Gulsum Agaogluye derheqê qewimîyayîşo ke Wan de di leşkerê Tirkî destdergê bi koçberêk kerdbî de qisey kerd û vat ke kerdoxî nîjadperestîye ra miqate benî, hêzê xo TSKyî ra gênê.

 

4ê Çeleyî de qezaya Serava ya Wanî de di leşkerê Tirkî destdergê bi cinîya Afganistanî ya bi nameyê L.M.ye kerdî. Seba dosyayê di leşkeran qerarê nimitişî dîyaye. No qewimîyayîş qewimîyayîşo ke serra 2020î de Wanî de hirê wezîfedarî merkezê Tepîya Şirawitişî yê Kurubaşî de destdergê bi cinîyêk kerdbî ard vîrê merdiman. 

 

Endama Komîsyonê Koçberîye ya Partîya Demokratîke ya Şaran (HDP) Gulsum Agaogluye derheqê polîtîkayanê şerê taybet û hedefgirewtişê koçberan de qisey kerd.

 

‘Kerdoxî TSKyî ra hêz gênê’

 

Gulsume da zanayîş ke 2017î de di camêrdî destdergê bi cinîyêk koçbere ya bi nameye Emane ya di gane kerdbî û dima ra zî aye qetil kerdî û wina vat: “Kerdoxî destdergîya cinîyanê koçberan meşru vînenî. Qewimîyayîşê Wanî de zî eynî sebeb esto. Kerdoxî polîtîkaya bêcezaverdayîşî ra cesaret gênî. Kerdoxî seba ke wezîfedarê asayîşî yê xo gird vînenî û zanê ke hêzê leşkerî yê dewleta Tirke (TSK) înan pey de yo.”

 

‘Vanê qey do têkoşînê cinîyan teslîm bigêrî’ 

 

Gulsume sewbîna eşkera kerd ke Kurdistan de cinîyî bi binpaykerdişê heqan yê sucê şerî reyde yenê rî bi rî û hemverê cinîyanê Kurdî de polîtîkaya şerê taybet yenê rayraberdiş û wina dewam kerd: “Qewimîyayîşê xokiştişê Îpek Ere de zî kerdox Musa Orhan cezaya ke ganî bidîya nêgirewt. Cinîyî hemverê polîtîkayanê dewleta Tirke de zaf xover danî. Coka ra zî hewl yeno dayîş ke têkoşînê cinîyan teslîm bêro girewtiş la do ser nêkewî.” 

 

Gulsume ard ziwan ke sucê nefretî yê hemverê koçberan Partîya Zaferî ra dima zêdîya û tena Umît Ozdagî nê çîyî nêşuxulneno, Kemal Kilidarogluyî zî ge-ge seba tepîya şirawitişê koçberan nê vatişî şuxulnayo. Gulsume vat: “Pêro şertê ke koçberîye awan kenî ganî suc bêrî hesibnayîş.”

 

‘Ganî têkoşîn bêro girdkerdiş’

 

Gulsume qiseykerdişê xo yê peyênan de veng daye pêro cinîyan ke îmkanê têkoşîno hempar ganî pîya viraştiş û cinîyê Tirkîyaye têkoşînê kede yê hempar rayra bibî.