AMED - Werdpewje Şehnaz Akyil viraştişê ‘rûnê hîz’ ke verê ra heta ewro ameyo, qal kena.

 

Rûnê hîz, tarîxê xeylê kanî de hetê cinîyan ra seba şîfa her derdî rê ameyîne viraştiş. No werdo ke xeylê xo arayî de yeno werdiş bi rûn û dims yeno viraştiş û xeylê feydeyê ci zî estê.

 

Viraştişê rûnê hîzî

 

Werdpewje Şehnaz Akyil da zanayîş ke no werd sey werdêk zaf kan o û pîlanê ra xo mûsaya û wina qal kerd: “Vernê de ma rûnê keyeyî helênenê. Dima ra ma serê adirî ra gênê û 10 deqeyî serdin kenê. Tay germê ci şikêno, ma reyna danê serê adirî û ma dima ra dims kenê ci. Ma danê têmîyan ro. Zaf nêpewjêno. Eke zaf bipewêjo, dims veşeno. 5 deqeyan pewjeno û ma wurznenê. Çiqas merdim bido têmîyan ro tehmê ci hende weş beno.”

 

‘Bîrînan rê şîfa yo’

 

Şehnaze dîyar kerd ke rûnê hîzî seba birînan zî şifa yo û wina vat: “No werd seba cibîyanê diganeyan zî şîfa yo. Verê kesê ke nê werdêne rew ameyîne serê xo û baş bîne. Heta zimistanî zaf zêde yeno werdiş. Seba nêweşîyan beno şîfa. Pêro dejî birneno.”

 

Heta 12 aşman zî eşkeno bêro werdiş

 

Şehnaze bale ant serê zehmetîyê ci zî û wina qedêna: “No werdo ke şîfa yo zaf zehmet o. Seba werdêk zaf kan o û viraştişê ci zî her kes nêzano. Ez qije bîya gama ke şîne keyeyê pîrêka xo, mi uca de dîyîne. Hamnanî viraştêne kerdêne kîler û zimistanî werdêne. Tena zimistanî nê 12 aşman zî eşkeno bêro werdiş. Tena bi rûn û dims yeno viraştiş. Sewbîna çîyêk bîn ci de çin o. Ma dabi xebatkarêke xo. Vat, no werd mi xeylê berd demanê verînan. O vatiş tesîr serê mi de kerd û ez xeylê kêfweş bîya.”