Rabîa Onver

 

COLEMÊRG - Pîruze Gelîcî ke adetê kofîya ke kulturê kurdî de rolê ci muhîm a, dewam kena û dîyar kena ke aye seba nê adetî dana ciwîyayîş xeylêk kêfweş a û heto bîn ra zî viraştişê kofîye kesê bînan ra mojnena ra.

 

Kofîya ke xemla tewr muhîm ê cil û belgê kulturê kurdan a, Colemêrg û qezayanê ci de hema yenê şuxulnayîş. Cinîyî; mîtîng, Newroz û bernameyê xususî de kofîyanê xo danê sereyê xo. Cinîyê kurdî pêwa pêro polîtîkayanê teda û asîmîlasyonî kulturê xo ciwîyenê.

 

Westayî zaf tay mendî

 

Colemêrg û qezayê ci de kofîyî hetê cinîyan ra yenê şuxulnayîş. Girêdayîşê kofîye zî zaf xususî ya û her kes nêeşkeno bikero. Na babete de hûmara kesê ke kofîyan girê danê zaf kêmî ya. Şemzînan de Pîruze Gelîcî nê adetî dewam kena.

 

Pîruze bi mêrdeyê xo yo ke qeza de her di lingê xo vînî kerdê reyde nê karî kena û pê debara xo kenê.

 

‘Her ca ra sîparîşî ameyî'

 

Pîruze dîyar kena ke demê dewe de eleqeyê aye seba karê destan zêde bîya û vat: "Ma papik û laçikan viraştêne. Mêrdeyê mi mamoste bi. Keyeyê ma dewe de bi. Ez zî bi baxçe reyde eleqedar bîyîne. Mêrdeyê mi dimayê qezayêk seqet mend û fek mamostetî ra vera da. Ma vat ma kofîyan viraznê. Vernê de endîşeyî ma estbî, dima ra ma çend kesî dîyî. Wina hêdî hêdî karê ma zêde bi. Ma sîparîşî girewtî. Kofîye mîrasê kulturê kurdî ya. Seba ma nê adetî dewam kenê, ma kêfweş ê. Yê ke ma eşnawenê sîparîşan danê. Ma xeylêk kêfweş benê. Seba ma kulturê xo dewam kenê û keda ma her ca de yena vînayîş ma kêfweş ê."

 

Krîzî tesîr serê vayîya kofiyan zî kerd

 

Pîruze bale ant serê krîzê ekonomî û wina vat: "Kam biwazo bimuso yeno verê ma, ma musnenê. Çiqas kesî bimusê hende baş o. Planê ma esto ke ma cayêk sey atolye abikerê. Hedefê ma atolyeyêk o. Ma kumaşan başurê Kurdistanî ra gênê. Verêê ma 100 TL rotêne nika seba vayîyan ma bi 200-300 TL roşenê."