WAN - Cinîyan dîyar kerdî ke sebebê krîzê ekonomîye polîtîkayê şerî yê îqtîdarî yo û vat, bi weçînayîşêk neweyî reyde bi yewîya kurdan û vurnayîşê îqtîdarî do çareserî pê bêro.

 

Cinîyê Wanijî reaksîyon vera krîzê ekonomî ke her ke şino zêde beno de mojnayî û vatî, sebebê nê polîtîkayê şer û tecrîdî yo. Sewbîna dîyar kerdî ke yewin çareserî yewîya kurdan a û vurnayîşê îqtîdarî yo.

 

Cinîyê Wanijî ke bazar de dayîş û girewtiş kerdêne, derheqê çareserîya krîzê ekonomî de erjnayîş kerdî û cewabê pêrûne yê seba çareserîyê krîzî zî ‘şîyayîşê îqtîdarî' bi.

 

'Ganî kurdî bibê yew'

 

Reşîde Kestana ke ameya bazar û yew bi yew tezgahan gêrena wina vat: "Her roje zamî yenê kerdiş. Ameyîşêk ma yê baş çin o. Ez 500 TL kîra dana. Bi sobe yo. Mi komir bi teqsîd girewt. Ez nêeşkena faturayê awe û ceyranî bidî. Ganî kurdî êdî rayanê xo bidê partîya xo. Ganî bibê yew û peynîya nê zulmî bîyarê.

 

'Çareserî vurnayîşê îqtîdarî yo'

 

Cinîya bi nameyê Îclal Kirbaş zî dîyar kerd ke krîz tesîr serê pêro cuye kerdo û vat: "Krîzî tesîr serê her çî de kerdo. Şar nêeşkeno çîyêk bigîro. Berzbîyayîşê dolarî tesîr serê her çî de keno. Çîyêk destê kesî ra nîno. La ganî no îqtîdar, no hukmat bivuryo. Seba vayîye kes nêeşkeno berardişêk bikero. Seba şar berardişêk bikero, ganî îmkan bibê."

 

‘Ma bi zor pîzeyê xo mird kenê'

 

Meryem Kaya zî dîyar kerd ke ê 7 kesî yê û di kesî şuxulênê û wina dewam kerd: "Her di zî binê meaşê asgarî de şuxulênê. Ma her çî kêm keno û wina ciwîyenê. Yanî ma krîzêk pîl ciwîyenê. Çuwalê ardanî bîyo 500 TL. Şekir bîyo hezar TL. Ma çi bigîrê, çi nêgîrê. Debare nêbena. Ez bi saetan bazar de gêrena. Her çî ra nîm kîlo zî nêeşkena bigîrî. Reyan zî destveng agêrena."

 

'Îqtîdar bikewo do krîz biqedîyo'

 

Eqlîma Abî zî reaksîyonê xo wina mojna: "Ma dest erzenê çi, vay o. Seba krîzî ma nêeşkenê çîyêk zî bigîrê. Ganî vernîya nê bêra girewtiş. Eke îqtîdar bikewo do krîz zî biqedîyo. Ez venga şaran kena, wa kes rayanê xo nêdo AKP-MHPyî. Sebebê krîzî tecrîd û polîtîkayê şerî yê hukmatî yo."