Dilan Babat/Melek Avci

 

ANQARA – Hemsereka Koma Têkoşînê Huqûqî yê Mîyanneteweyîye Mîchela Arrîcale da zanayîş ke muracatê Tirkîyayî de înan wezîrîya edaletî ra waştî ke pêvînayîş pê bîyarê û vat: “Eke wezîrî pêvînayîş qebul bikerdêne amacê ma no bî ke ma pirê çareserîye awan biker. La ma vanê ke tecrîdê serê Birêz Ocalanî ganî wedarîyo.”

 

Tecrîdo girankerde yê serê Rayberê PKKyî Abdullah Ocalanî dewam keno û na rewşe şarê Kurd û rayaumûmîye de şikan rê rayîr akena. Wezîrîya Edaletî û CPTyî vera bi hezaran muracatan bêvengîya xo domnenê û vera na rewşe de reaksîyonê zêdîyenê. Partîya Demokratîke ya Şaran (HDP) vera tecrîdî de çalakîya nobetî  verê meclîsî de da dest pêkerdiş û heto bîn de zî delegasyonêk mîyanneteweyî seba bale antişê serê tecrîdî û binpaykerdişê heqan yê zîndanan ame Tirkîya.

 

Endamê Delegasyonê Mîyanneteweyî ke seba bale antişê serê tecrîdî û binpaykerdişê heqan 7 welatan û pêropîya 36 kesa ra pê ameyêne, mabenê 25-27ê Çeleyî de Stenbol, Amed û Anqara de pêvînayîşan pê ardî. Pêvînayîşan ra dima Stenbol de derheqê babeta ‘tecrîdo mîyanneteweyî’ Forumêk pê ardî û netîcename weşanayî. Netîcenameyî de ame dîyarkerdiş ke çareserî azadîya Abdullah Ocalanî yo.

 

Hemsereka Koma Têkoşînê Huqûqî yê Mîyanneteweyî-Merkezê Demokrasî û Cigêrayîşî yê Antalya û endama Yewîya Huqûqnasanê Ewropa (ELDH) Mîchela Arrîcala ke mîyanê delegasyonî de ca gêna û zîyaretê Anqaraye de ca girewte derheqê babete de qisey kerd. 

 

‘Do avûkatî bikewî têgêrayîş’

 

Mîchela dîyar kerd ke welat û raşteyê mîyanneteweyî seba pêvînayîşê Ocalanî reyde ke bi hezaran muracatî ameyî kerdiş, bêvengî û wina vat: “No bêvengî seba îtîraznêkerdişê avûkatan yeno kerdiş. Tirkîya seba tecrîdî cewabêk nêdana û bêveng a. Çimkî zanê ke cewab bidî do avûkatî hemverê bêhuqûqîyan de muracatan bikerî. Coka ra zî pêvînayîşan asteng kena. Sebebo bîn zî no yo ke Tirkîya usulanê huqûqî ra remena. Tecrîdê Îmraliyî zî tede. Pêro tepişteyî wayîrê heqanê seyyewbînan û heqanê umudî yî. La Ocalan înan ra bêpar yeno verdayîş û pê bêhuqûqîyan nê heqî destê birêz Ocalanî ra ameyî girewtiş. 

 

‘Bedelê tehdîdan Kurdî danî’

 

Mîchela vat ke vera bêhuqûqîyanê Tirkîya raşteyê mîyanneteweyîye zî bêveng o û bi serran o şarê Kurd bi problemê jeopolîtîkî ameyo tengkerdiş. Mîchela wina dewam kerd: “Dewlete seba ke menfîetanê mabenê xo û Erdoganî nêxerepna nêwazena Erdoganî reyde bêra karşî. Coka ra Erdoganî reyde pê kerda. Lazimîya aye bi Erdoganî esta. Erdogan her tim Ewropa bi koçberan tehdît keno û vano ke do beranê xo akerî. Bedelê tehdîdan zî Kurdî danî.” 

 

Wezîrî cewab nêdano

 

Mîchela qiseykerdişê xo yê peyênan de bale ante pêvînayîşan ser û wina qedêna: “Rojeva esasî tecrîd o. Kişta ci de binpaykerdişê heqan yê zîndanan bî. Tirkîya şertanê tecrîdî normal kerda û sey rutînêk pê ana. Ma dezgehan reyde pêvînayîşî pê ard û ma qala rewşa tepişteyan kerdî. Ma waşt ke wezîrîya edaletî reyde pêvînayîş pê bîyarî. La cewab nêdîya. La eke cewab bidayêne se ma hadre bî ke seba çareserîye bibî pird. Umudê ma no bî ke muracatî bi fêde bibî. Ma wezîrîya edaletî ra pêvînayîş wazenî. Waştişê ma no yo ke tecrîdê serê Birêz Ocalan û tepişteyanê bînan wedarîyo. No pêvînayîş ra dima ma pêro avûkatî do xerîtaya xo do newe ra awan bikerî.”