Melîke Aydin

 

ÎZMÎR - Solîstê Koma Maye ra Evîndar Duleke ard ziwan ke muzîkê kurdî hetê ziwan û kulturî de xeylê muhîm o û vat: “Ganî muzîkê kurdî sey vîyarnayîşê wextî ya zî tena seba kêfî nêro destgirewtiş û ganî muzîkê kurdî sey lazimîya bîyayîşî bêro dîyîş. Ma do projeyanê sey koneran dewam bikerî.”

 

Ma Music Center Anqara, Îzmîr, Stenbolî de bi beşdarbîyayîşê seyan kesan konser viraşt. Seyme Organizasyon, Ma Music Centerî mîyanê hetkarîye de nê konseri pê ardî û şar eleqeyêk baş mojna konseran. Solîstanê Koma Ma ra Evîndar Duleke derheqê xebatanê averan de ajansê ma rê qisey kerd.

 

‘Vera kulturê şarê kurdî polîtîkayê xorî yenê rayraberdiş’

 

Evîndare ard ziwan ke Amed û Kurdistan de xeylê cayan de konseran pê anî û turneyê metropolanê Tirkîya de raştê eleqeyêk gird yê şarî ameyî û wina dwam kerd: “Seba ke ziwan û kultur bêrî pawitiş, ma nê amacî rê xizmet kenî. Vera kulturê şarê kurdî de polîtîkayê xorî yenê rayraberdiş. Coka ra no xebat seba m abi mana ya. Ma veyveyan de deyîranê xo vatêne û şînan de ma zêmaranê xo qêrayêne, coka ra ma kulturê xo wina dwam kerd. Nika zî seba ke dewam bikerî muhîmîya konseran esto. Seba ke ma bi asanî vajî ma kurd î ganî ma hîna zêde muzîkî ra girêdaye bibî.”

 

'Ganî muzîkê kurdî sey lazimîya bîyayîşî bêro dîyîş’

 

Evîndare da zanayîş ke verê cû zî û nika zî muzîkê kurdî û vatişê ci timî ameyî diznayîş û domna: “Seba ke ma vernîya nê çîyî bigêrî ganî ma konseran pê bîyarî. Ganî muzîkê kurdî sey vîyarnayîşê wextî ya zî tena seba kêfî nêro destgirewtiş û ganî muzîkê kurdî sey lazimîya bîyayîşî bêro dîyîş. Ma do projeyanê sey koneran dewam bikerî.” 

 

'Eke deyîr ganî bimanî tarîx do ganî bimano’

 

Evîndare dîyar kerd ke dengbêj û muzîkê kurdî pêropîya kulturêk awan kenî û muzîkê kurdî wina ganî maneno û vat: “Repertuarê ma de deyîrê ke bi vînîbîyayîşî reyde rî bi rî yî estî. Seba ke ma nê deyîran newe ra ganî bikerî ma xebetîyenî. No hem seba ma hem zî seba şarî muhîm o. Eke deyîr ganî bimanî tarîx do ganî bimano.” 

 

'Konser têkilîyan xurt keno' 

 

Evîndare ard ziwan ke konser têkilîya mabenê komelî xurt kena û wina vat: “Ma çend bajaran de zêde konser pê bîyarî hende do muzîkê kurdî vila bibo. Muzîkê kurdî seba ke şarê kurdî ziwan û kulturê xora dûrî nêkewo muhîm o.” 

 

Do Amedê de hirê konserî bêrî dayîş

 

Evîndare tewr peynî vat ke Amed de do hirê konserî pê bîyarî û wina qedênaye: “Ma ercî danî kultur û muzîkî. Şima zî ercî bidene û bipawêne.”