STENBOL - Avûkatê Buroyê Huqûqî yê Asrinî seba pêvînayîşê bi muwekîlê xo Rayberê PKKyî Abdullah Ocalanî bikerê, reyk ebîn muracat kerdî.

 

Avûkatanê Rayberê PKKyî Abdullah Ocalanî ra Rezan Sarica, Raziye Ozturk, Faîk Ozgur Erol û Emran Emekçî seba pêvînayîşê bi Rayberê PKKyî Abdullah Ocalan ke Zîndanê Tîpê Fyê bi Asayîşê Berzî yê Îmraliyî de binê şert û mercê giran ê tecrîdî de yeno tepiştiş û ci ra xebere nîna girewtiş, muracatê Serdozgeriya Komare ya Bûrsayî û Midûrîyê Zîndanê Îmraliyî kerdî.

 

Dadgerîya Înfazî yê Bursayî 12ê teşrîna verêne serra 2021ine de seba 6 mengan cezaya qedexeyê pêvînayîşê bi avûkatan reyde dabi Ocalanî. Avûkatê Buroyê Huqûqî yê Seserre zî 22yê teşrîna peyêne serra 2021ine de bi waştişê “pêvînayîşê lezgînî” ê bi miwekîlê xo Abdullah Ocalan, Omer Hayrî Konar, Hamîlî Yildirim û Veysî Aktaşî muracatê Dadgeriya Înfazî ya Bursayî kerdî. Dimayê cewabdayîşê nê muracatê avûkatan pê hesiyayî ke qerarê qedexeyî ameyo dayîş.

 

Qerarê qedexeyê pêvînayîşê bi avûkatan reyde ke 12ê teşrîna peyêne de amebi dayîş, 22yê nîsane de peynî bi. Serê nê de avûkatan seba pêvînayîşî xeylêk reyan muracat kerdî la tu bersiv cewab nêame dayîş. Avûkatan na rey zî 29ê nîsane de bi waştişê pêvînayîşî muracatê Dadgeriya Înfazî ya Bursayî kerdî.

 

Birayê Rayberê PKKyî Abdullah Ocalan, Mehmet Ocalanî tewr peyîn 25ê Adara serra 2021ine de bi birayê xo reyde serê telefonî de pêvînayîş kerd. La qiseykerdş nîmced amebi birnayîş. Sewbîna avûkatanê Ocalanî zî tewr peyîn 7ê Tebaxa serra 2019ine de bi miwekîlê xo reyde pêvînayîş kerdibî.

 

Eynî wextî de Serekîya Heyetê Dîsiplînî 3yê sibata 2022ine de cezaya qedexeyê pêvînayîşê bi keyeyî reyde seba 3 aşman dabi Ocalan û no qerar 21ê sibate de qetî. bibi. Seba ke heme astengiyê bêhuqûqî yê vernîya pêvînayîşê bi keyeyî reyde bêro wedaritiş û pêvînayîşî virazîyê, avûkatê Ocalanî 28ê adare de muracatê Dadgeriya Înfazî ya Bursayî kerdî. Dimayê ke no muracat ame redkerdiş, avûkatî pê hesîyayî ke qerarê qedexeyê pêvînayîşî yê 3 aşman ameyo dayîş.