GÎRESÛN - Hîn zîndanê ke Zîndanê Tîpê Lyê Espîye ya Gîresûnî de 55 rojî yo hemverê binpaykerdişê heqan de grevê vêşanîye de yê, çalakî açarnayî grevê vêşanîye ya bêdem û bêdore. Tepişteyan dîyar kerdî ke îşkenceyê fîzîkî û psîkolojîk înan rê yeno kerdiş.

 

Çalakîya grevê vêşanîye ke tepişteyê Zîndanê Tîpê Lyê Espîye yê Gîresûnî de hemverê binpaykerdişê heqan û tedayê îdarekarîya zîndanî amebî destpêkerdiş, roja 55ine de dewam keno. Tepişteyê ke çalakîya grevê vêşanîye de yê Erdal Emeç, Aydin Ogûz, Ahmet Bûdak çalakî açarnayî grevê vêşanîye ya bêdem û bêdore. Tepişteyo nêweş Erdal Emeç keyeyê xo gêra, dîyar kerd ke grevê vêşanîye açarnayê sewîyeyêka bîn û ard ziwan ke heta ke waştişê înan bi ca bêrê, do çalakîya înan a grevê vêşanîye dewam bikera.

 

'Îşkenceyê fîzîkî û psîkolojîk'

 

Erdalî neql kerd ke seba grev ewro dayê destpêkerdiş, do înan berê hucreyê yew kesî. Tepişteyo Metîn Ûyar ke roja 40ine yê grevê vêşanîye de yo reyke bîn keyeyê xo gêra û vat: “Bi tecrîdî reyde hewl yeno dayîş ke rûmetê merdimayîyî û nasnameyê merdiman bêro binpaykerdiş. Zîndanê Espîyeyî de meylaê faşîst esto. Tîya de sereke hêrişê nasnameyê ma yê kurdî kenê. Tîya de îşkenceyêk fîzîkî û psîkolojîk esto. Embazanê ma nêbenê nêweşxane, kitabê kurdk nêdanê ma. Çend rojan ra reyke erzenê serê qawişanê ma û embazanê ma kelemçe kenê û benê. Çend embazê ma derb kerdî û înan rapor girewt. Tîya de embazê ma yê nêweşî estê k everê mergî de yê.”