Melîke Aydin

 

ÎZMÎR - Cinîyê KBGyî dîyar kerdî de îqtîdar tewr zêde şîyo bedelnayîşê Desturê Bingeyîn û bi no hawa reyna vejîya raşte ke cinîyî bîyî hedef û bi nizdîbîyayîşê weçînayîşan babeta hêrişan ercayeyê vatişî yo û seba xerîtaye dîyar bikerî do 3ê Sibate de bi beşdarbîyayîşê cinîyan kombîyayîşêk pê bîyarê.

 

Cinîyî Pîya Bi Hêz ê (KBG) 23ê Çeleyî de pêvînayîşê Egeye de cinîyanê Îzmîr, Aydin, Manîsa, Mugla û Denîzlîye reyde ame têhet û kombîyayîş pê ardî. Cinîyî nika seba xerîtaya xo dîyar bikerî 3ê Sibate de do kombîyayîş pê bîyarê.

 

Avûkate Berfîn Kayaya ke pêvînayîşê Egeye de qisey kerd, bale ant polîtîkaya bêcezaverdayîşî ser û vat ke polîtîkaye serdestîya camêrdî bêcezaverdayîşî zêde kena. Berfîne sewbîna dîyar kerd ke îqtîdar komelo serdest yê camêrdî awan keno û hewl dano ke polîtîkaya bêcezaverdayîşî sere de bi cinîyan dana çewtkerdiş û vat ke do KBGyî hemverê bêhuqûqîye de bêveng nêmano. 

 

‘Vatişê nefretî zêde bîyî’ 

 

Endama KBGyî Zîlan Taybogaye derheqê bedelnayîşê Desturê Bingeyînî de qisey kerd û na babete de wina vat: “Netîceyê polîtîkayanê îqtîdarî de dişmenîya cinîye û LGBTÎyî ameyî rojeve. Pê qanûnê keyeyî cinî û LGBTÎyî tehdît kenî û AKP normanê xo yê ehlaq û olî awan keno. Coka ra zî vatişê nefretî zêde bîyî. Ma cinîyî tu ferzkerdişêk qabul nêkenî. Hêrişê sîstematîkî estî la ma do heme cinîyî raşteyan de pîya têkoşîn bikerî.”

 

Keda cinîye ameye qiseykerdiş

 

Endama KBGyî Sîbel Yaşare da zanayîş pêvînayîş de binpaykerdişê keda cinîye munaqaşa kerdî û tesîrê ci yê na babete de ameyî ercnayîş. Sîbele ard ziwan ke hedefe înan ra yew no yo ke bi cinîyanê herême reyde û cinîyanê kedkaran reyde têkilîyan awan bikerî û no donemo vernîya ma de do beşdarê xoverayîşê cinîyanê kedkaran bibî, xebatanê herême rêxistin bikerî. 

 

Endama KBGyî Berfîn Buyukertaşe derheqê babeta rêxistinkerdişê xebatanê unîversîteyan de qisey kerd û vat: “Rêxistinbîyayîşê unîversîteyan ame qiseykerdiş. Unîversîteyan de qereqolê polîsan ameyî awankerdiş û yewîyê asayîşî yê taybetî şîdet pê anî û qeyûm tayînê unîversîteyan yenê kerdiş. Derheqê çalakîyê ke heqê ma yî de qerarê qedexekerdişî yenê dayîş. Ma derheqe na babete de munaqaşa kerd. Ma do 3ê Sibate de bi cinîyan reyde kombîyayîşêk virazî. Ez veng dana pêro cinîyan ke beşdar bibî. Wa beşdarê kombîyayîşî bibî û vatişanê xo vajî.”