ÎZMÎR - Cinîyan dîyar kerdî ke weçînayîşê serekkomarîye de hetê tîfaqê Ked û Azadîye ra mojnayîşê namzeda cinîye do cinîyanê ciwanan de xobawerîyêk awan bikero û wina vat: “Ganî siyaset êdî tekelê camêrdî ra bixelesî yo. Coka ra zî eke na game bêra eştiş do xeylê tesirin biba.”

 

Weçînayî serrekkomarîye nizdî beno û munaqaşayê namzetîye rojeve de yo. Ma derheqê namzetanê cinîyan yê Tîfaqê Ked û Azadîye de cinîyan ra ercnayîş girewtî. Cinîyan dîyar kerdî ke ganî sîyasetê camêrdî û kalan xilas bibo û paştîdayîş seba namzetanê cinîyan bêro dayîş. 

 

‘Do xobawerye bido cinîyan’

 

Endama Tegêrayîşê Cinîyanê Azadan (TJA) ya Îzmîrî Hayat Îzgîye dîyar kerd ke komel cinîyan ra hîna zede bawer keno û no zî bi wesîleya têkoşînê partîya Kurd û têgêrayîşê azadîya cinîyanê Kurdî de pê ame. Hayate wina dwam kerd: “Cinîyî serkêşê şorişî yî. Bi serekê cinîyan hîna zêde do bawerî biba. Serkêşê cinîyî yê Kurdî nika tewr zêde tepişteyî û ciwanî nê cînîyan pey ra şinê. Çimkî komel zî zano ke hevsengîye cinî virazena. Xelisîyayîşê cinîyan yê feodalîzmî ra bi wesîleya têkoşînê azadîya Kurd pê ame. Êdî Şarê Kurd wazeno ke weçînayîşan de namzetanê cinîyan bimojno. Rojanê verênan de mi cinîyêk şinasanaye û mi aye rê vat ke ma wazenê namzetê ma cinîyî bibî. Xeylê eceb mende. çimkÎ cinî hîna weş vengî cinîyan dana eşnawitiş.”

 

‘Komel zano ke cini eşkena her çîyî bikera’

 

Hayate da zanayîş ke komel zano ke cinî eşkena her çîyî bikera û dewam kerd: “Partîyê kurdî cinîyan teşwîqê rayberîye bikerî. Na rewşe tesîrê xo daye pêro têkoşînê cinîyan ser. Cinîyê ciwanî eke namzetê cinîyî bivînî do xobawerîbîyayîşêk qezenc bikerî. Vere cû zanayêne, nika komel zî zano ke cinîyî eşkenê her çîyî bikerî. Cinîyî vîşêrê keyeyî zî eşkenê her çîyî bikerî. Namzet cinî biba tena cinîyê Kurd do cinîyê Tirkî zî kêfweş bibî.” 

 

‘Ganî hişmendîya femînîstî zî biba’

 

Paştîdayîşê Morî yê Denîz Usluye zî dîyar kerd ke ganî Tîfaqê Ked û Azadîye ke rayîrê hirîne pêşnîyar kerda ganî tewr zêde cinî û domanan ser de tesîr bikero û ganî têgêrayîşe biba nesne û wina vat: “Cinîyî zanê ke tîfaqê Milletî eşkeno probleman çareser bikero. Tîfaqê Ked û Azadîye hemverê nêseyyewbînanîya cînsîyetî û na nuqta de cinîyê ke xebatan rayra benî zî tede ca bigêrî. Temsîlkarîye de tena cinîbîyayîş mird nêkeno. Ganî hişmendîya femînîstî zî biba. Ganî kesê ke raşteyan de ca gênî ra bibî. Meral Akşenere temsilkara cinî ya la no mird nêkeno. Ganî umud zî bida. Vetişê namzetê cinîyî do tesîrêk pozîtîf virazo. Profîlê namzetî xeylê muhîm o. Tena akademîk nê ganî bi femînîzmî nizdî bibî. Ganî êdî sîyaset tekelê camêrdî û kalan ra xilas bibo.”

 

Cinîyî do vatişê bindestan hîna baş bîrayî ziwan

 

Endama Partîya Ameyoxî ya Çep û Kesan Nevîn Aytekîne zî na babete de ercnayîşanê xo ard ziwan ser û vat ke hem HDP û hem zî Tîfaqê Ked û Azadîye azadîya cinîyan bipawî û qiseykerdişê xo wina qedênaye: “Wexto ke ma zext û şîdetê AKP-MHPyî ke bi cinîyan kenî ewnîyenê, ferzo ke namzetê cinîyî bivejîyî. Cinîyî do vatişê bindestan hîna baş bîrayî ziwan. Vera serdestîya camêrdî de cinîyî ganî vatişê xo bivajî. Pêkerdişê Stnebolî hedef ame mojnayiş û dima ra ame fehskerdiş. Na babete de namzetî seba cinîyan çîyêk vajî zî seba LGBTÎ+ yan tu çîyêk nêvanî. Eke namzetêk cinî bêra mojnayîş do têkoşîn hîna serkewte bibo.”

 

Hemsereka Partiya Newe ra Xelisnayîşî yê Sosyalîstî (SYKP) Aslihan Tîtîze zî diyar kerd ke dimayê weçînayîşî zî proses seba tifaqî girîng o û vetişê namzedê cinî zaf girîng o. Aslihane sewbîna ard ziwan ke hemverê dişminîya cinî ya sîstematîk namzedê cinî ganî bibê û do no hetê komelî ra zî bi pozîtîf bêro pêşwazîkerdiş.