WAN - Cinîyê Wanijî dîyar kerdî ke sebebê krîzê ekonomî bûtçeyê şerî rê yeno visnayîş, ganî îqtîdar şêro û vatî, "Çareserî vurnayîşê krîzî yo."

 

Netîceyê polîtîkayê şerî yê hukmatê AKP-MHPyî de şar roj bi roje tewr feqîr beno, hetê tewr zêde nê krîzî ra bi tesîr benê zî cinî yê. Wendekar û esnafê Wanî derheqê krîzê ekonomî de qisey kerd.

  

‘Seba krîz çareser bibo ganî hukmat bivuryo’

 

Hanîfe Guzela ke Bazarê Şarî de ya nêzdîyê 15 serrî yo esnaf a, dîyar kerd ke bi serran o esnaf a. La zehmetîyê ke emsar wareyê ekonomî de vînayê serrê bînan de nêdîyê û wina vat: “15 serrî yo ez esnaf a. Zahmetîyê ke mi na serre de dî tu serre de nêdî. Na serre seba mi tewr xidar bî. Seba krîzê ekonomî mi zehmetîyê xeylê giranî vînayî. Her aşme kîra zêde bena. Di serrî verê mi 100 TL kîra dayîne. Nika ez hezar TL kîra dana. Fatureyê ceryanî verê 40 TL ameyîne la nika zî 350 TL danê. Her çî diqatê xo vay bîyo û rewşe xeylêk xirab a. Çareserîya vejîyayîşê nê krîzî zî oyo ke hukmat bivuryo.”

 

‘Eke hukmat şêro ma do helmêk bigîrê’

 

Hanîfe, ard ziwan ke kesê 20 serrî yo serê kursîya îqtîdarî de roniştê ganî dimayê weçînayîşî bêto kerdiş û wina vat: “Seba çareserî bêro vînayîş, ganî vernî de nê şerî peynî bikerê. Her ke şer vila beno, bûtçe şerî rê şino û seba ke bûtçe şerî rê yeno visnayîş, şar vêşan û têşan maneno. Eke bûdçe seba şerî ameyîne visnayîş, şarî rê bi ameyîne visnayîş. Welatijî hende feqîr nêbîne. “Şer tena gonî û hîsêranê dayîkan ano nê welatî, çîyêk bîn nê.”

 

‘Îqtîdar şêro ma do tay asan bibî’

 

Hanîfeye qiseykerdişê xo wina peynî kerd: “Ganî îqtîdar şêro. Êdî ma wazenê ke tay asan bibî. No 20 serrî yo ke feqîrîye cuyenî. 20 serranê peynênan de feqîrî û nêseyyewbînanî giran bîyo. Ganî şer bêro vindarnayîş. Heta ke şer bibo do butçe şerî rê bêro birnayîş. Şar vêşan û têşan o. Şer tena dej û dejan ano nê welatî. Sewbîna tu çîyêk nêano.” 

 

‘Ganî nika mi karê xo bikerdêne’

 

Wendekara bi nameyê Ceylan Aşkana ke Kibris de Beşa Rehberî û Şêwirmendîya Psîkolojîkî wenda dîyar kerd ke qedîyayîşê mektebî ra dima aye cafeyêk de dest bi xebatî kerda û wina vat: “Ekonomî vera ma xeylê zehmetîyan ante. Qedênayîşê unîversîteye seba mi zehmet bî. Krîzê ekonomîye tesîrêk gird mi ser de zî kerd. Ez mecburbîya ke bixebeta. Pereyo ke ez qezenc kena zî dana kitaban. Herinda ke ez meslekê xo bikera cafe de xebetîyena. Şertê ekonomîye ra mi xeylê zehmetîyana nt. Herinda ke kare xo bikera ez cafe de xebetîyena. Pereyo ke qezenc kena zî dana kitabanê seba KPSSyî. La hetê ekonomîye de zehmetîyan ancena. Ez wazena meslekê xo bikera.”

 

‘Ganî her kes gamêk bierzo’

 

Ceylane qiseykerdişê xo wina qedênaye: “Ez wazena ez û wayê xo cuyêk weş bicuyî. Seba nê çîyî hewl dana. La krîzê ekonomîye vernîya nê çîyî gêna. Seba tay çîyî raşt bibî ganî her kes vernîya nê çîyî bigêro. Yewine çareserî weçînayîşêk raşt o.”