DÎLOK - Hemwelatîyê Dîlokî ke erdlerzî de banê înan xerepîyayî û bi seyan kesî binê erdlerzî de mendî,  ardî ziwan ke AFAD erê ameyo cayê qewimîyayîşî û vatî: “Wexto ke yeno qiseykerdiş zî selahîyetdarî vanê ke ma cayê şarê xo de yê. Acaba heta nê saetî ê kam ca de bîyî? Qey nînê.”

 

Bîlançoya erdlerzo ke girdîya ci 7,7 û 7,5î bî û merkezê ci qezaya Bazarcikî ya Mereş û Dîlokî bî, her ke şina giran bena. Netîceyê erdlerzo ke pê ame de xeylê kesî dinyaya xo bedelnayî, birîndar bîyî û xeylê kesî bine xirbeyanê bana de mendî. Seba kesê ke binê xirbeyan de mendî hewldayîşê girdi dewam kenê.

 

Bade taqîpkerdişê rewşa Amedî mi verê xo da cayê erdlerzî ke tewr zêde tesîrê xo Dîlokî ser de kerdbî. Wexto ke ez ver bi Dîlokî kewta rayîr welatîyê ke weyşayî otobusî pêro zî qala erdlerzî kerdêne û çimanê înan ra hîssê înan ameyêne wendiş. Panc saet û nîme ra dima ez resaya Dîlokî. Wexto ke ez otobusra ameya war no dej û tofanê bajarî zerrî ra ameyêne hîskerdiş. Seba ke ez şêra taxê ke netîceyê erdlerzî de zêde zirar dîyî paweyê wesayîtî vinderta. La erdlerzî vera wesayîtê mîyanê bajarî nêxebetîyayêne. Hewldayîşan ra dima mi wesayît temin kerd û ez ver bi taxa Încî Pinarî ya girêdayeyê qezaya Şehîtlamîlî ra şîya. Rayîr de wexto ke ma şîyêne şofor qala bajarî kerd. Şofor vatêne ke ‘mi heta nê emrê xo erdlerzêk winasî nêdîbî. Tîya de cuye vinderta.’ Nê vatişan ra dima bêvengîyêk virazîya. Şofor dima ra qala rewşa taxe kerd ke awanîyî tede rijîyayî û vat ke rewşa şarî xeylê xirab a.

 

Çime înan mizgînî de yo

 

15 deqeyî ra dima ez resaya taxa Încî Pinarî. Wexto ke ez resaya tîya mi dî ke konêk sey bi emanet ameya awankerdiş, keyeyî zî heto bîn de agir tavistbî û ronişte paweyê migînîye de bî. Ez nizdîyê keyeyan bîya û înan silan kerda û vînena ke çimê her kesî hissin o.  Çimê înan paweyê xebera ke merdimanê înan ra bêra. Her keyeyêkî ra persena merdimanê şima ke binê xirbeyan de mendî ra xeberêk esta. Ê zî sey cewab vanê ke vanê 3 ya zî 4 kesî binê xirbeyan de yî. Ez keyeyêk ra persena merdimê şima bine xirban de mendî. Helbet no vatiş asan nîyola dejê ci zî hende gird o.

 

‘Dejê ma pîl o’ 

 

Dayîka bi nameyê Elîf Erena ke taxa Încî Pinare de merdimê aye binê awanî de mendê û şewe verê berî de adirî de derbaz kerd, vat demê erdlerz virazyayo ê xeylêk tersayê û wina vat: “Ma pêro xeylêk tersayî. Dimayê erdlerz virazya, ma xo eşt teber û wesayîtan de û kuçan de vindertî. Dima ra ma eşnawit ke awanîya vistewreyê mi rijyaya, ma zaf xemgîn ê. Dejê ma pîl o. Vistewreyê mi, cinîya ci û di lajê ci binê awanî de mendî. Hîn binê xirbeyê awanî de yê, nêameyî vînayîş. Ma paweyê ke agahîyêk înan ra bigîrê. Hêvîya ma oyo ke bi hawayêke baş bêrê vînayîş.”

 

‘Ma paweyê paştdayîşî yê’

 

Elîfe da zanayîş ke Şaredarîya Dîlokî tu hetkarî nêdayê înan û wina vat: “Ne çadirî, ne kursî û ne zî betanî ardî. Na betanî zî kesêk bi xo ard vila kerdî.  Ne şaredar û ne zî selahîyetdarêk bîn nêameyî persê ma nêkerdî.  Dinya serd a û şar xeylêk zehmetî anceno. Siba heta şanî ma tîya paweyê agahîyêke yê. La komê AFADî zî erey ameyî. Seba nê çî heme kesan bi îmkanê xo birîndar xelas kerdî.  Ma wazenê wa heme kesî paştdayîş û hetkarî bidê ma. Ganî şarê ma na rewşe de hişyar bo. Ma bi zorî bi îmkanê xo adir fînenê ta û xo germ kenê.” 

 

‘Cigêrayîş dewam keno’ 

 

Fatma Etere zî erdlerzê ke pê ame bi vatişê “bi ters bi” name kerd. Fatmaye, da zanayîş ke no ters do tu wext nêkero xo vîr ra û wina vat: “Keyeyî ma ra waya mi, mêrdeyê mi û di tutê aye binê awanî de mende. Ma xo hema nêresnayo înan. La cigêrayîş dewaç keno.”

 

‘Paştdayîş bidê ma’ 

 

Fatma, dîyar kerd ke ê binê hawayê serdî de kuçeyan de manenê û no seba înan xeylêk zehmet o. Fatma, wina vat: “Zêde hetkarî nêame. Tîya de komê AFADî kêm bî. Seba nê zî ame vatiş ke nê komî Stenbolî ra ameyî. Coka cigêrayîşê înan erey mend. Ma wazenê her kes paştdayîş bido ma.”