Sema Çaglak

 

AMED - Amed de komêk ciwanê zerrîdayoxî seba mexduranê erdlerzî bi rojan o hetkarî arê danî. Hetkarîya ciwanan ke Parka Sumerî de ameybî depokerdiş badê ameyîşê Parlementerê AKPyî Pakîze Mutlu û zabitayan vînî bî.

 

6ê Sibate de Kurdistan de bi girdîya 7,7 û 7,5î de Mereş û Dîlokî de erdlerzêk pê ame. Erdlerzo ke tesîrê xo 10 bajaran ser de kerd de bîlanço her ke şino giran beno. Roja yewine de xeylê partîyê sîyasî, dezgeû rêxistinê sîvîlî û hemwelatîyî seba mexduranê erdlerzî hetkarî arê danî û resnenê cayanê erdlerzî.

 

Amed de komêk ciwanê zerrîdayoxî seba mexduranê erdlerzî bi rojan o hetkarî arê danî. Hetkarîya ciwanan ke Parka Sumerî de ameybî depokerdiş badê ameyîşê Parlementerê AKPyî Pakîze Mutlu û zabitayan vînî bî. Ciwana ke mîyanê xebata erdlerzî de ca girewtêne ajansê ma rê qisey kerd. 

 

‘Bi kutiş ma parke ra vetî’

 

Merve N.ya 22 serrî da zanayîş ke Parlementera AKPyî Pakîze Mutlu ameya Amedî û hewl daya ke vengê ciwananê zerrîdayoxan bibirnî û wina qala hedîseyî kerd: “Vizêr parlementera AKPyî Pakîze Mutlu ameye Parka Sumerî ma rê persa ke tewr zêdekamhetkarî şiraweno tîya. Ma zî vat HDP, TÎP û dezge û rêxistinê sîvîlî şirawenî. Dima ra îdîa kerd ke AKP û Îyî Partî hetkarî şirawenî. Bi no hawamabenê ma de munaqaşa vejîya. Dima ra wezîfedarêk zabite ame parke û hewl da ke ma parke bivejî. Parlementera AKPyî zî hewl da vengê ma bibirna. Dima ra parlementer raşteye ra dûrî kewte, zabita heqerat b ima kerdî û hêrişê me kerdî. Me ewja ra vetî.” 

 

‘Mexdurî hetkarîyan ra fêde nêgirewtî’

 

Merveye dîyar kerd ke bi rojan pê îmkananê xo hetkarîyan arê dayî û wina dewam kerd: “La nika ma nêzanê ke hetkarîya ke ma arê da kam ca de ya. Malzemeyê ke ma seba mexduranê erdlerzî arê da nêame vilakerdiş. Pêro malzemeyê ma mîyan yew saetî de şewe vînî bî. Ma AFADî ra persê hetkarîyan ke ma arê dabî kerd ke kam ca de yî? Ma rê ame vatiş ke pêro malzemeyê şima vilayê meduran ameyî vilakerdiş. Ma hemwelatîyanê dorme û yê parke de vindenî ra pers kerd, ê vatî ma rê nêameyîdayîş. Ma konê welatîyan gêrayî la hetkarî înan rê zî nêameya dayîş. Eke ameya vilakerdiş qey qeydê înan çinî yo. Hektarîya ke ma arê da kam ca de ya? Ma wazenê kesê berpirsîyar bêrî dîyîş.” 

 

‘Dewlete hetkarîyê ke yenê kerdiş asteng kena’

 

Merveye tewr peynî ard ziwan ke tehamulê AKP û dewlete raştîyan rê çinî yo û vat: “Seba lazimîyê şarê Amedî paştîdayîşêk gird pê ameye. Gama ke ma raştî partîyê AKP û ÎYÎ Partî rê vat, waştî kem a bêveng bikerî. Eke AFAD nêeşko hetkarî bikero qey hetkarîya şarî asteng keno. Şar mirdê xo esto. Şarî de rihê paştîdayîşî esto. Seba ke ma qisey nêkerî û mexdurîyeto ke ma şahid bîyî nêresnî ma yenê astengkerdiş. Dewlete hetkarîyan nêdana şarî û hetkarîyê ke yenê kerdiş asteng kena."