Zelal Tunç-Elfazi Toral 

 

WAN - Cinîyê Wanijî bale antî serê tecrîdê giran yê serê Rayberê PKKyî Abdullah Ocalanî û wina vatî: “Azadîya Abdullah Ocalanî, azadîya ma pêrûnan a.”

 

Rayberê PKKyî Abdullah Ocalan ke 9ê teşrîna verêne 1998ine de Sûrîye ra ame vetiş û 15ê Sibata 1999ine bi komployê mîyanneteweyî ardî Tirkîya. Serê komployî ra 24 serrî derbaz bi. Tecrîdê giran yê serê Rayberê PKKyî Abdullah Ocalanî de dewam keno û bi di serrî yo zî tu agahî ci ra nîna girewtiş. Cinîyê Wanijî derheqê tecrîdê giranî yê serê Abdullah Oalanî de yeno kerdiş qisey kerd û dîyar kerd ke tecrîd heme welatî ver bi kaosî beno û seba aştî û demokrasî pê bêro, ganî tecrîd peynî bibo.

 

‘Ganî şarê kurdî rayberê xo ra agahî bigîro’

 

Ferîde Ozlu da zanayîş ke ganî tecrîdê serê rayberê PKKyî Abdullah Ocalanî peynî bibo û wina vat: “Sere de serê Birêz Ocalanî, serê heme tepişteyan de tecrîd bi ca yeno. Bi aşman o agahî ci ra nîna girewtiş. Şar weşîya ci ra biendîşeyîn o. Ganî şarê kurdî rayberê xo ra agahî bigîro. Sere de keye û şar nê çî paweno. Waştişê îqtîdarî oyo ke pêro têkiliyê bi îmraliyî reyde bêrê birnayîş. La şarê kurdî wazena rayberê xo ra agahî bigîro.”

 

‘Şuxulnayîşê çekanê kîmyewîyan bêhuqûqî yo’

 

Ferîdeye wina qedêna: “Tu cayêk dinya de caardişê tecrîdî çin o. Seba bîyayîşê kurdî esto, tecrîd pê yeno. Yewin çîyo ke ma wazenê peynîbîyayîşê tecrîdî yo. Hemverê Başurê Kurdistanî de çekê kîmyewî yenê şuxulnayîş. Gelo no kam ci huqûq û heqî de esto? No nîno qebûlkerdiş. Bi desan ciwanê ma bi çekê kîmyewî ameyî kiştiş. No zulm o. Bi tecrîd vanê qey do şar biqedîyo. La şarê kurdî peyser game nêerzeno. Wa nê wina bizanê.”

 

‘Azadîya Ocalanî azadîya pêro kesan a’

 

Munîfe Kaçak dîyar kerd yewin rayîrê aştîye Îmraliyî ra derbaz beno û erjnayîşê xo wina dewam kerd: “Heta Birêz Ocalan azad nêbo şarê kurd, şarê tirk azad nêbeno. Serrgêra komployî de ganî her kesê aştî û demokrasî wazenê kuçeyan de bê. Seba do pêvînayîşî Ocalanî aştî bîyaro. Azadîya Ocalanî azadîya pêro şaran a.”

 

‘Serekî seba ma cinîyan zaf çî kerd’

 

Hamiyet Pak zî bale ant serê perspektîfê Rayberê PKKyî Abdullah Ocalanî yê derheqê cinîyan û vat: “Bi nêzdîbîyayîşê 15ê Sibate reyde xemgîniya ma reyna teze bena. Ma cinî tu wext çîyê ke Serekî kerdi nêkenê xo vîr ra. Bi xêrê ey ma nê wareyan de yê. Bi keye û avûkatan reyde nêeşkeno pêvînayîş bikero. Bi di serrî yo agahî ci ra nîna girewtiş. Sebebê pêrodayîşî tecrîd o. Bi desin ciwanî seba şerî dinyaya xo bedelnayî. Ganî pêvînayîş dest pêbikero, aştî pê bêro. Wa gonî nêrijîyo , aştî û azadî pê bêro.”