Rabîa Onver - Sema Çaglak

 

DÎLOK - Qezaya Islahiyeyî de 11 rojî yo problemê awe û ceyranî esto. Cinîyê ke konan de manenê dîyar kerdî ke problemê cinîyan yenê peygoşkerdiş.

 

Dimayê erdlerzê merkezê Bazarcixê Mereşî de welatîjî bi pêroyî 10 bajaran bi rojan o teber de yê û şert û mercê xidar de ciwîyenê. Bi taybetî zî tewr zêde cinî erdlerzî ra tesîr bîyê. Cinîyê ke nêeşkenê lazimîyê xo yê bingehîn pê bîyarê. Bi nêbîyayîşê awe û ceyranî problemê hîjyenî zî ciwîyenê. Cinîyê ke qezaya Islahiyeyî de konan de manenê, derheqê rewşa xo de qisey kerdî.

 

‘Ma hetê hîjyenî de bi endîşeyîn ê’

 

Menekşe Yeter, dîyar kerd ke seba ke wezîfedarê cinî çin ê, nêeşkenê problemanê xo bi rehetî vajê û vat: “Roja erdlerzî ma warway û ma tena bi cilanê xo serê xo vejîyayî. A roje ra nata hetê kincan ra ne zî zî lazimîyê xo nêeşkenê çîyêk bikerê. Rewşe û halê ma werte de yo. Erdlerz ra her kes bi tesîr bi û mexdûr bî. Tîya tewr zêde wezîfedarê camêrdî estê yan zî yê ke lazimî danê camêrd ê, ma nêeşkenê lazimîyê xo yê taybetî  bi rehetî vajê. Xeylêk cinî fedî kenê û ma hetê hijyenî ra xeylêk bi endîşeyîn ê. Bi nê lêşinî û seba problemê hîjyenî do nêweşîyî zêde bibê. Xora hêdî hêdî jan vila beno. Ganî no problemî bi lezginî bêrê çareserkerdiş. Ceyran tîya de çin o la sobaya ceyranî danê. Sobaya gazî danê la xeylê xo soba zî çin a. coka ma şan de zaf mexdûr benê.”

 

‘Nêweşîyî virazîyenê’

 

Hatîce Yeter zî erdlerz de 2 tornê aye dinyaya xo bedelnayê û awanîya înan rijya ya. Hatîce, vat: “Hewteyêk zêdeyêr o na awe ne zî ceyran esto. Kone dayê ma, la tena bi kone problemî nînê çareserkerdiş. Ma nêeşkenê serê xo bişûyê ne zî eşkenê pakitî bikerê. Nêweşîya şekirî mi reyde esta. Ma xeylêk kesî emrê ma pîl o û nêweş ê. Ma xeylêk şert û mercê xidar de manenê. Sewbîna şan de xeylêk serd o ma nêeşkenê serdan ra rakewê.”

 

‘Ganî seba astengdaran hetkarî bêro kerdiş’

 

Tulîn Guvene zî dîyar kerd ke ê 7 kesî konêke de manenê û keyeyê aye de 3 kesî astengdar ê. Tulîne, vat: “Roja destpêkê erdlerzî ra heta nika awe û ceyran çin o. 3 astengdarê mi estê ez ewnîyena înan ra û xeylêk zehmetî ancena. Ganî seba astengdaran zî hetkarî bêro kerdiş.”