Zelal Tunç

 

WAN - Erdlerzo ke merkeze ci Bazarcix vî û girdîya ci 7,7 bî tesîrê xo xeylê bajaran ser de viraşt. STO û HDP çarçeweya kampanyaya ‘Keyeyê Way û Bira’ ye de paştîdayîşê şarî dewam keno.

 

6ê Sibate de merkezê ci qezaya Bazarcixî ya Mereşî de bi girdîya 7.7 û 7.6î de di erdlerzî qewimîyayî. Erdlerz tesîrêk gird bi 10 bajaranê Kurdistanî ser de viraşt. Bi hezaran kesî binê xirban de mendî, bi hezaran kesî dinyaya xo bedelnayî, bi hezaran kesî bê ban mendî û keyeyê înan rijîyayî. Roja erdlerzî ra heta nika Rêxistina Komelkê Sivîlî (STO), Pêameyê Platformê Demokrasî û Kede kelepulê germkerdişî, gida, kon, sobe, komir û xeylê lazimîyanê cuye pê bi desan TIRan mexduran rê şirawit. Çarçaweya  kampanyaya ‘Keyeyê Way û Bira’ de paştîdayîşê şarî dewam keno. Bi hezaran erdlerzî Wan de muracatê kampanyaye dayî. 

 

Hetkarî nêresaye bi hezaran mexduran

 

300 keyeyî seba kampanyaya ‘Keyeyê Way û Bira’ muracatê ‘Maseya Krîzî ya Erdlerzî’ ke binê banê Koordînastorîya Komeleya Cigêrayîşî ya Koçberî ya Serhedî de ya kerdî. Bi hezaran keyeyî zî qeydê xo depoyê hetkarîye ke tede hetkarî ameybî komkerdiş viraştî û lazimîyê cuye girewtî. Reyna bi hezaran keyeyî zî muracatê  ‘Maseya Krîzî ya Erdlerzî’ ya Pêkhateyê Platformê Demokrasî û Kede dayî.

 

Ganî paştîdayîş dewam bikero

 

Endama Heyetê Weşanê Jîneolojîye Neslîhan Şedale da zanayîş ke ê sey Pêameyê Platformê Demokrasî û Kede 6ê Sibate ra nata dest bi kampanya kerdî û heta ewro zî dewam kenî. Bi seyan keyeyî çarçeweya kampanyaya ‘Way û Bira’ ye de muracat kerdî. Hetkarîyê ke depoyan de ameyî komkerdiş mexduran rê yene vilakerdiş. Kuçe û raşteyan de xopaştîdayîşêk gird aver şî. Dayîkî tena nane tenurî viraştî. La hema zî mexdurîyetê erdlerzî dewam keno. Ganî paştîdayîş dewam bikero.

 

Cinî û domanî muracat kerdî

 

Ayfer Geliboluya ke sey "Ekîba Tesbîtî" ya Platformê Demokrasî û Kede raşteyan de xebetîyena da zanayîş ke xeylê keyeyê ke muracat kenî Wanî ra koç kerdî û wina vat: “Heta nika dormeyê 300 keyeyî muracatê maseya krîzî kerdî. Xeylê keyeyê mexdurî estî û tutî travmayêk derbaz kenî. Tewr zede tutî û cinîyî yene muracatê ma kenî. Camêrdî herêma erdlerzî de serê xirbanê keyeyanê xo de paweyê malê xo yî. Umudê înan no yo ke uca ra merdimêk înan bivejîyo ya zî binê xirban ra malê xo bivejnî. Heta ke destê ma ra yeno ma lazimîyanê înan yê cuye ca anî.”

 

Seba kampanyaya 'Keyeyê Way û Bira’ muracatê HDPyî dayî

 

Semîha Tekera ke muracatê kampanyaya ‘Keyeyê Way û Bira’ kerd ard ziwan ke 8 serrî vere cû sebebanê ekonomiye vera qezaya Elbakî ra koç kerdî û wina vat: “Ma koçê Kuçeya Şahîn Beyî ya Dîlokî kerd. Ma seba kampanyaya ‘Keyeyê Way û Bira’ muracatê HDPyî kerd. Ma Dîlok de kîra de manenî û tena bi gureyo ke pîyê mi keno ma hewl danî debara xo bikerî. Nufusê keyeyê mi 6 kesan rap ê yeno. Roja erdlerzî  ma serê sibayî bi leqayîş ferq kerd. Ma vejîyayî teber û roja ewile ma bine varanî de mendî. Ma zaf tersayî. Dêsê ma erdlerzî de teqayî. Ma betanîyanê xo girewt û ma êdî nêkewtî zerre. Ma tu hetkarîyêk nêgirewt û seba hetkarîye ma ameyî Wan. Ma muracatê kampanyaya ‘Keyeyê Way û Bira’ ya HDPyî da. Na kampanya xeylê muhîm a.”