RIHA - Keyeyê Şenyaşarî ke seba erdlerzî mabêne dabî Nobeda Edaletî, roja 700î de nobeta xo ancî dewam kerd. Emîne Şenyaşar nobeta de qisey kerd û waştişê veradayîşê lajê xo kerd.

 

Merdim û pawitoxê Parlamenterê AKPyî yê Rihayî Îbrahîm Halîl Yildizî 14ê hezîrana serra 2018ine de Pirsûsê Rihayî de hêrişê keyeyê Şenyaşarî kerd. Netîceyê hêrişî de mêrde û di lajê Emîne Şenyaşare ameyî qetilkerdiş. Emîne Şenyaşar û lajê aye Ferît Şenyaşar ke bi birîndarî qirkerdişî ra xilas bibi, 9ê adara serra 2021ine de vernîya Edlîyeyê Rihayî dest bi çalakîya Nobeta Edaletî kerdibî. Keyeyê Şenyaşarî ke seba erdlerzî roja 700ine de mabêne dabi çalakîya xo, ewro reyna ameyî verê berê Edliyeyê Rihayî dest bi nobete kerdî.

 

‘Ma zî paştdayîş rê mabêne da’

 

Çalakîye de Ferît Şenyaşarî da zanayîş ke seba paştdayîşê bi mexdûrê erdlerzî reyde mabêne dabî çalakîya xo û wina vat: “6ê sibate roja 700î yê Nobeda Edaletî de welatê ma felaketêk pîl virazya yo. Demêk ke  xeylêk kesî binê xirbeyan de paweyê xelisnayîşî bî, seba ma exlaqî nêame ke nobete dewam bikerê. Coka ma 15 rojî mabêne da û bi qasê ke destê ma ra ameyîne, ma hewl da birînê mexdûrê erdlerzî derman bikerê.”

 

'Heta edalet bi ca bêro do nobeta ma dewam bikero’

 

Bi domdarî Ferît Şenyaşarî dîyar kerd ke waştişê înan hema nêameyê qebûlkerdiş, coka nobeta xo dewam kenê û wina vat: “Nêweşxane de 3 endamê keyeyê ma ameyî qetilkerdiş. Birayêk mi hema zîndan de yo. Serekkomar zî mîyan de her kes zano ke no çî bêhuqûqtî yo. Labelê seba wekîlê partîya îqtîdarî no qirkerdişî kerdo, hema zî edalet pê nêameyo. Heta edalet pê bêro zî ma do çalakîya xo ya vernîya edlîye dewam bikerê.”

 

‘Wa ceza bikerê?’

 

Çalakiyê de Emîne Şenyaşar zî ewil seba mexdûrê erdlerzî venga hetkarî kerd û wina vat: “Heta lajê mi nêro veradayîş ma do nobeta xo dewam bikerê. Keyeyê mi ra hîrê kesî kiştî la ê kesî bi rehetî gêrenê. Nê zulmî ma rê kenê. Edî bes o. Wa kesê sûcêk înan çin o bêrê veradayîş. Wa tutî mi zî vera bidê. Bi 5 serrî yo tutê mi hucreyê yew kesî de yeno tepiştiş. Hem merdiman kişenê, hem zî bi nameyê wekîltî bajar de gêrenê. Hukmat çira nê kesan ceza nêkeno?”