Şehrîban Aslan

 

MELETÎ - Zerrîwazê Weqfê Stargehê Mor Çatiyî yê Cinîyan do bi cinîyanê herêmanê erdlerzî reyde bêrî têhet. Cinîyê zerrîdayoxî ke pêvînayîşê xo yê yewine Meletî de pê ardî do dima ra derbazê Semsûr, Mereş û Hatayî bibê.

 

Erdlerzo ke Merkezê ci qezaya Bazarcixî ya Mereşî bî, 10 bajaran ser de tesîrêk gird viraşt. Nê cayan ra yew zî Meletî, dew û qezayê ci bî. Erdlerzî vera bi hezaran kesî dinyaya xo bedelnayî, bi hezaran kesî birîndar bîyî û bi hezaran kesî zî seba bê war mendî. Seba hemwelatîjanê herêma erdlerzî çar hetê Tirkîya û taybetî Kurdistan ra seba paştîdayîşî hetkarî ameyî arêdayîş û ameyî şirawitiş. Cinîyî paştîdayîşan de serkêşî kerdî. Na çarçewa de zerrîwazê Weqfê Stargehê Mor Çatiyî yê Cinîyan roja yewine ya erdlerzî ra nata cinîyan reyde yo. Cinîyê zerrîwazê do bêrê Meletî ke na herême de tesîrê erdlerzî zêde virazîya. Zerrîwazî do cinîyan reyde pêvînayîş pê bîyarê, lazimîyanê înan tespît bikerê û waştişê înan goşdarî bikerê. Cinîyê zerrîwazî do dima ra şêrê Semsûr, Mereş û Hatayî.

 

‘Zerrîwazî bîyî di parçe’

 

Zerrîwazê Weqfê Stargehê Mor Çatiyî yê Cinîyan Gulsun Kanate dîyar kerd ke erdlerzî vera ê sey weqfî cinîyan reyde bajaran de ameyî têkişt. Gulsune dewamê qiseykerdişê xo de wina vat: “Badê erdlerzî ma yewser cinîyanê femînîste reyde ameyî têkişt û ma pêvînayîşê femînîste awan kerd. Elbet aye game ra dima tay zerrîwazî vejîyayî raşteyan ke xo biresnî kesê ke binê xirban de mendî, paştî bidî înan û pêvînayîşî pê bîyarê. La heto bîn de hewl dayî ke lazimîyanê ferzan bidê. La dima ra ma her roja ke vîyartêne de ma sere çîyê ke beno ke lazim bibî de fikirîyayî. Ma ekîbê sey psîkososyal, kompîtur û depoye awan kerd. Ma xebatanê winasîyan de ca girewt. Ma sey Mor Çatiyî roniştî û fikirîyayî. Ma qerar da ke ma cinîyê ke no trajedîyî cuyayî reyde bêrî têhet û qisey bikerê.”

 

'Ma seba pêvînayîşî tîya de yê’

 

Gulsune qiseykerdişê xo yê peyênan de bale ant ke ê her çend ke çapemenîye ra taqîp bikerî zî bi çimanê xo dîyîş cîyayo û wina peynî ard: “Her çend ke ma embazanê xo yê raşteyan ra malumatan bigêrî zî mumkun nîyo ke ma lazimîyanê cinîyan bizanî û tecrubeyanê înan ra fêde bigîrê. Mumkun nîyo ke ma bizanî lazimîyê dezgeh û rêxistinan yê ke do paştî bidî cinîyan bi çina esto. Ganî ma biameyêne tîya û nê lazimîyan bivînayêne û bizanayêne. Vere her çîyî ma waşt ke ma pêvînayîşêk pê bîyarê. Coka ra zî ma tîya de yê.”