Medya Uren

 

SEMSÛR - Yew mexdûrê erdlerzî Funda Bahçe ya 21 serrî û hîkayeya xo pare kerd û wina vat: “Vernîya erdlerzî keyeyê mi, mi terikna û mi hewl da ez cuyêka newe awan bikerî. Nika keyeyêk mi zî çin o ez o çi bikerî, do ameyoxê senîn bibo nêzana?”

 

Bi erdlerzê merkezê Bazarcixê Mereşî pê ame xeylêk kesî dinyaya xo bedelnayî û bi hezaran welatîyî bi tesîr bî. Bi erdlerzî reyde merdimê xeylêk kesan dinyaya xo bedelnayî. La hîkayeya Fundaya 21 serrî verîya erdlerzî de dest pêkeno. Funda Bahçeya bi eslê xo qezaya Besnî ya girêdayê bajarê Semsûrî ya erdlerzî yê bi tena konêke ke Koordînasyonê Krîzî yê Partîya Demokratîke ya Şaran (HDP) awan kerda de manena. Goreyê Funda vana aye vernîya hetê keyeyê ra nîna qebûlkerdiş û bi tena manena.

 

‘Ez tim bi tena menda’

 

Funda Bahçe hetê mêrde reyde zewicîyaya ra yena xapênayîşî û 19 serrîya xo de bê keyeyê xo reyde şina. Funda wina dest bi hîkayeye xo kena: “Ez nêzana ke ça ra dest pêbikerî. Ma di way ê û birayêk  ê. Waya mi zewicyabî. Mi dimayê mektebê mîyanên dest bi kar kerd. Seba rewşa ma ya ekonomî dest nêdayîne ez seba keyeyî bîne hetkar. Mi uca de mêrdeyê xo nas kerd. O 35 serrî bi. Mi sey ey kerdêne û ey reyde şîne. Demo ke ey reyde şîne sî şîdetê mi reyde dest pêkerd. Bi zorê waştêne bi mi reyde şa bibo la demo ke mi red kerdêne şîdetê fîzîkî û vatişê mi rê kerdêne. Dimayê hewteyê 3ine zî mi keye ra vet. Ez agêraya keyeyê dayîka xo la ber mi rê nêame akerdiş. Keyeyê ma kewtî mabêne. Keye de zî şîdet serê mi de dewam kerdêne. Êdî her tim cuya mi wina bi. Ez tim bi tena menda.”

 

‘Mi hewl da cuyêka newe awan bikera’

 

Funda dîyar kerd ke hewl daya cuyêka newe awan bikera û wina dewam kerd: “Dimayê demêk zamayê mi waştişê nêbaş mi rê kerd. Mi na hedîse keye rê neql kerd. La çîyê ke mi hêvî kerdêne nêbi, hemverê nê de şîdetê serê mi zêdeyêr bi. Ez şîya, mi qereqole de gerre kerd. La keyeyî vat, zûr kena û wina ey xilas kerdî. Dedê mi, mi bir ser goristanî û uca mi kuya. Xeylêk zirar da mi. Dimayê nê hedîsan keyeyê mi qebûl nêkerd û mi nêwaşt. Ez bi aşman nêweşxaneyî de menda. Hetê pîskolojî de problemi min ê pîlî vejîyayî. Înan derman dayîne mi. Hîna ez tedawîya heban gêna. Ez nêweşxaneyê piskiyatrî de zî bi tena menda. Kes nêame verê mi.”

 

‘Mi her karî kerdêne’

 

Funda dimayê tedawiya xo zî agêra Semsûr. Funda wina dewam kerd: “Ez derbazê Semsûrî bîya. Mi uca de hewl da cuyêka newe awan bikera. Reyke bîn ez tekstîlan de, karê pakitî de şuxulyaya. Çi kar ame vernîya mi, mi kerd. Ez kîra de mendêne, mi tupek û cayêk ê rakewtişî xo rê viraşt. O zî bi hetkarîya cîranan. Dima ra mi hewl da hîn xo kom bikerî.”

 

‘Cuya mi reyke bîn serûbin bî’

 

Funda seba keyeyê xo bivîna reyke bîn kewena mîyanê hewldayîşan. Eşnawena ke keyeyê aye şîyo Edene. Aye vernîya erdlerzî şina Edene înan gêrena la xo nêresnena keye. A şewe zî erdlerz virazêno. Dimayê erdlerzî xo resnena Semsûr û vînena ke awanîya aye xisarêk pîl girewta. Funda qesawetê xo ard ziwan û wina vat: “Ez şaş menda. Mi nêzana ez rastî se bikerî. Ez nêeşkayîne bikewî zereyê keyeyî zî. Ez ameya konan de manena. Ez nêzana do se bibo, ez o se bikerî? Cuya mi serûbin bi. Nika reyke bîn werdê ma anê û konêk esta ma bikewê ci. La do no heta ça şêro nêzana.”