Melîke Aydin

 

HATAY - Mexdûrê erdlerzî dîyar kerdî ke Hatay de xoresnayîşê xizmetê weşîye mumkin nîyo û ekîbê weşîye yê zerrîwazî zî dîyar kerdî ke ganî lezgînî sîstemê hekîmtîyê keyeyî bêro awankerdiş.

 

Dimayê di erdlerzê pîlî yê merkezê înan Mereş bi, Odaya Tabîbanê Tirkan (TTB) û Sendîkayê Karkeranê Weşîye (SES) qezaya Defne ya Hatayî Koordînasyonê Krîzî awan kerdî û girêdayeyê ci revîrî ameyî awankerdiş. Revîran de xizmet seba mexdurê erdlerzî yeno dayîş. Ekîba doktor, hemşîre û xebatkarê weşîye pê yeno, birînan pansuman kenê û seba nêweşîya kronîk û akut dermanan peyda kenê. Nêweşê bînî yenê tîya dîyar kenê ke xizmetê weşîye ra dewlete tu feyde nêgînê û nêeşkenê dermanan bivînê. Doktorê zerrîwazî dîyar kenê ke ganî lezgînî sîstemê hekîmtîya keyeyî bêro awankerdiş.

 

‘Hûmar û tewirê dermanan çin o’

 

Kedkarê weşîye ke seba karmend ê nêwazenê nameyê înan bêrê dayîş, dîyar kerdî ke bi 7-8 saet mesayî hîrê doktor hîrê hemşîre û xebatkarê weşîye xizmet danê 500î zêdeyêr nêweşan. Kedkeran dîyar kerdî ke seba hîjyen çin o, nêweşî zî vila benê û seba serdî, kuxik, germbîyayîşê bedenî zêde virazênê. Sewbîna dîyar kerdî ke nêweşî problemê dermanan ciwîyenê, wazenê dermanê ke her wext xebitnenê peyda bikerê, dermanê muadîl qebûl nêkenê, tewirê dermanan çin o. Sewbîna dîyar kerdî ke seba ultrason çin o, cinîyê digane zî derman nêbenê.

 

‘Ganî derbazê sîstemê hekîmtîyê keyeyî bibê'

 

Kedkarê weşîye yê zerrîwaz wina vatî: "Seba sîstemê kompiturî çin o, ma nêeşkenê biewnê nêweşan ra. Sîstemê qeydî çin o. Xizmetê ke ma awan kerdo, heta cayêk o. Xebatkarê zerrîwazî yê tîya destûrê xo şuxulnayî û ameyî tîya. Bexşê dermanan zî bi sînor o. Rewşa zerrîwazî neweyî nêrê de do çend hewte dima no xizmet biqedîyo. Ganî lezgînî hekîmtîya keyeyî bêro awankerdiş û nêweşî bêrê taqîbkerdiş."

 

Kedkarê zerrîwazî dîyar kerdî ke hewl danê lazimîyê cinîyan ê sey ped, dermanê kontrolê welidnayîşî, testê diganeyî peyda bikerê û vatî, dimayê erdlerzî cinîyî demêk derg regl manenê û heta 15 rojan dewam keno.

 

Nêeşkena dermanê kênaya xo bivîna

 

Seher Cevheroglu seba dermanê kênaya xo şî revîra TTByî nêeşkena dermanê kênaya xo peyda bikera. Sehere da zanayîş pêwa nêweşxaneyê Sahra agahîyê kênaya ci girewta zî her reya ke şina derman peyda nêbeno û vat: "Ez pêro Antakyayî gêrena. Hêzê kênaya mi çin o. Mi vîtamîn seba kênaya xo waşt. Werdik baş çin o. Ez şina ça mi uca ra şawenê cayêk bîn."

 

Seba dermanî ma yenê bajar

 

Ozlem Çapanoglu zî dîyar kerd ke seba dayîka xo ya nêweşa dîyabet û parkînson a derman gêrena û vat, xizmetê weşîye zaf qels ê û vat: "Ez dewa Yeşîlpinar de ciwîyena. Xizmet nîno dewe. Merdimê nêweşî estê. Ma yenê merkez dermanan gênê. Hem seba tutan, hem seba kal û pîran qesawetê ma estê. La babeta weşîye de paştdayîş çin o."