Nişmîye Guler

 

MEREŞ - Merkezê Koordînasyonê Erdlerzî yê KESKî yê Narliye heta ewro hetkarî resnaya 10 hezar mexduranê erdlerzî. Endama MYKyî ya Egîtîm Senî Arzunur Şîmşek Evrene vat ke ganî paştîdayîş her tim bibo.

 

Badê erdlerzê 6ê Sibate ke merkezê ci qezaya Bazarcixî ya Mereşî bî xeylê bajarî wêran bîyî. Verê dewlete rêxistinê komelkî yê sivîl û zerrîwazê xo resnayî hetkarîya mexduranê erdlerzî. Endam û rayîrberê Konfederasyonê Sendîkaya Kedkaranê Rayapêroyî (KESK) zî roja ewile de Koordînasyonê Krîzî yê Erdlerzî awan kerd. 25ine de sere de Mereş û 11 bajaran de paştîdayîş mîyan de yê. Baskê Narli yê koordînasyonî heta ewro lazimîya 10 hezar mexduranê erdlerzî temîn kerd.

 

Lazimî bi paştîdayîşê psîkolojîkî esta

 

Endama Heyetê Rayîrberîya Merkezî (MYK) ya Egîtîm Senî Arzunur Şîmşek Evrene da zanayîş ke roja hîrine ya erdlerzî ra heta nika bi heme netîce û rayîrberîyan seferber bîyî û xo resnayî herême û wina vat: “Koordînasyonê ma do demderg bibo. Polîtîkayê ke herêma erdlerzî de yene rayraberdiş, cinî û tutan mexdur kenê. Lazimîya cinî û tutan zaf zêde bi paştîdayîşê psîkolojîke esta. Mektebî rijîyayî.  Her ca de rewşe seyyewbînan a.” 

 

Şertê zehmetin de zî do paştîdayîş dewam bikero

 

Arzunure sewbîna dîyar kerd ke dejê şarî zerrî ra hîs kenê û coka ra zî heta ke deste înan ra yeno paştîdayîşêk gird pê anê û wina dewam kerd: “Ma Narli de kon kreşêk akerd. Ma ekîban organize kerd ke tîya de lazimîyanê cinî û tutan rê bibê cewab. Ma do şert û mercê tewr zehmetinan de zî paştîdayîşê xo seba awankerdişê raşteyê cuye dewam bikerê.”

 

Tutan de ters esto

 

Arzunure dewamê qiseykerdişê xo de wina vat: “Tutan de ters esto. Ma nê çîyî tutan de vînenê. Kay seba înan zaf baş o. Embazê ma yê Egîtîm Senî pêroyê roje de bi tuyan reyde kayî kenê. Çîyo ke ma vanê perwerde qet şik çin o ke tena ders nîyo. Prosesê komelbîyayîş, xopêardiş, fehmkerdişê cuye. Ma do goreyê hetanê huqûqî û ercanê merdimîye de birînanê komelî pişnenê. Erdlerzî vera derbazê perwerdeyê dûrî ra bîyî. No tercihêk şaş bî. Na babete de akademîsyenê ke bi serran kede dayî ra ercnayîş nêame girewtiş. No zî sîstemê merkezî ra qewimîyeno. Çimeyê pêro dejan esasê xo de sîstem o.”

 

‘Wa kes nêterso’

 

Arzunure bale ant dewamkerdişê paştîdayîşan ser û qiseykerdişê xo yê peyênan de vat: “Tesilî wa kes nêterso. Wa kes xo nêdo hetêk. Berpirsîyarîya ke ma ya ke bi cinî û tutan reyde esto, ganî dewam bikero. Do paştîdayîşê ma dewam bikero. Paştîdayîş dano cuyayîş.”