Dîlan Babat 

 

DÎLOK - Hemsereka HDPyî ya qezaya Êlihî Gurbet Dogan dîyar kerd ke ê do 8ê Adare bi cinîyanê mexdûran ê erdlerzî dir pêşwazî bikerê û vat: "Ma do paştîdayîşê xo girs bikerê û xo biresnê mexdûrê erdlerzî."

 

Erdlerzo ke pê ame tesîrê temamê cuye û bi taybetî zî 11 bajaran kerd. Partîya Demokratîke ya Şaran (HDP) û Tevgerê Cinîyan ê  Azadan (TJA) roja ewilî heta ewro herêmê erdlerzî bi mexdûran dir bî. Seba lazimîyê cinîyan û tutan kewtî mîyanê hewldayîşan. Cinîyan emsar 8ê Adare do bi cinîyê ke erdlerzî mexdûr bîyê dir derbaz bikerê. Do Dîlok, Islahiye û Cebelînûrî de cinîyan reyde kom bibê.

 

Cinîyan bi sloganê "Şînê ma sebebê têkoşînê ma yo" 8ê Adare Dîlok û qezayanê ci de pêşwazî bikerê. Parlamenterê HDPyî Meral Daniş Beştaş, Fîlîz Kerestecîoglu û Muazzez Orhan do Dîlokî bê. Endamê Meclîsê Cinîyan ê  HDPyî zî seba lazimîyê cinîyan pakêtan amade kerdî. Hemsereka HDPyî ya qezaya Êlihî Gurbet Dogan 10 rojî yo qezaya Islahîyeyî de ya. Gurbete ajansê ma rê qalê xebatê xo û rewşa cinîyan kerd.

 

Xo resnayî xeylêk cayan

 

Gurbete dîyar kerd ke Islahîye û Cebelînûr de xeylêk taxê sey Fevzîpaşa, Turkbahçe, Karakaya, Karapolat, Kalecîk, Karapinar, Gulhoyuk, Şahmaran, Akinyolu, Yeşîlova, Kavaklar, Bayraktepe û xeylêk taxan de xo resnayê cinîyan.  Gurbete, dîyar kerd ke hetkarîyê ke Kurdistan û Tirkîya ra ameyê, resnayê mexdûrê erdlerzî û wina vat: "Roja ewilî konî çinbî. Kizilay û AFAD rewşêke wina de pey mendî û embazanê ma xo resnayî mexdûran. Wexto ke ez ameya Islahiye tena xirbî mendîbî. Sereyê ewilî ma bi welatîyê tîya reyde paştîdayîş aver berd. Bi awankerdişê Koordînasyonê Krîzî ma konî dayî ro. Seba cinî û tutan ma paketê taybetî amade kerdî. Pakêtê ke ma amade kerdî, resna mexdûran." 

 

TIRê morî resayî herêman

 

Gurbete, da zanayîş ke herêmê erdlerzî tewr zêde malzemeyê hîjyenî lazim ê û wina vat: "Xeylêk TIRê morî ameyî Dîlok. Kurdistan û Tirkîya ra seba mexdûrê cinî amadekerî ameyî kerdiş. Nê TIRê ke ameyî resayî waştişê cinîyan. Tîya de cinî nêeşkenê ped biwazê û şerm kenê. Cinîyî pakêtê ke ameyî amadekerdiş xeylêk feyde girewtî. Reya ewil felaketê ke virazya û welatî nêeşkayî 20 rojî xo biresnê malzemeyê hîjyenî. Wexto ke ma şîne dewan û taxan ma lazimîyê lazimî kerdêne rêze. Bi taybetî seba cinîyan; bincil, ped û şampuan lazim kerdêne."

 

Do serdayîşê mexdûran bikerê

 

Gurbete, dîyar kerd ke 27ê Sibate ra amadekarîyê 8ê Adare kenê û wina vat: "Ma wareyê erdlerzî de cinîyan reyde paştdayîşê xo girs kerd. Ma xebatê taybetî pê ard. Heyetê ma yê cinîyan do 4ê adare de bêrê Islahîye û Cebelînûr. No heyet do serdayîşê mexdûran bikero. Sewbîna ma pakêtê xo yê taybet seba cinîyan zî amade kerd. Meral Daniş Beştaş, Fîlîz Keresetcîoglu û Muazzez Orhan do tewrê serdayîşan bibê."

 

'Cinî bi şîdetî reyde rî bi rî manenê'

 

Gurbete, dîyar kerd ke raşteyê erdlerzî de kar û barê cinîyan hîna zêde bîyo û wina vat: "Weykerdişê tutan, heta pakitîya konî her çî cinî kena. Felaketêk ame ciwîyayîş labelê tewr zêde hetê psîkolojî de cinî tesîr bî. Sewbîna mîyanê konan de cinî hema bi şîdetî reyde rî bi rî manenê. Hemverê şîdetî de heta nika xebatêke taybet nêameya kerdiş. Seba nê sebebî xo resnayîşê pêro cinîyan mîyanê şert û mercê wina de girîng o. Konbajarî hetê selahîyetdarê dewlete ra baş nînê pawitiş. Ma do cinîyan reyde bê û ma do mîyanê paştdayîşî de bê."