Marta Somek

 

SEMSÛR - Hedle Muhammeda ke Kobanê ra şer vera koç kerda û Semsûr de bi ca bîya dikanêke kuaforî akerda û bi tena sereye xo têkoşînê cuye dana. Hedleye dîyar kerd ke keyeyê aye erdlerzî de zirarêk gird dîyo û vat: “Mi Kurdî bi tutanê xo nêda vîrîkerdiş. Heta peynîya cuya xo ez do têkoşîn bikera.”

 

6ê Sibate de merkezê ci qezaya Bazarcixî ya Mereşî de di erdlerzî qewimîyayî û dima ra zî 20ê Sibate de merkezê ci Samandagi û Defne ya Hatayî de erdlerzêk bîn qewimîya. Nê erdlerzan de goreyê dayeyanê fermîyan bi deshezaran kesan dinyaya xo bedilnayî û xeylê bajarî zî erdlerzî ra tesir bîyî. Bajarê ke erdlerzî ra tesir bîyî ra yew zî Semsûro ke ci de rijîyayîşêk gird qewimîya. Semsûr de bi deshezaran kesî erê ameyîşê ekîbê AFAD û îqtîdarî vera dinyaya xo bedilnayî.

 

Kobanê ra heta Kurdistan xoverdayîş

 

Cinîya bi nameyê Hedle Muhammede serra 2014î de hêrişê DAIŞî yê vera Kobanê de ameye Tirkîya û Semsûr de bi ca bî. Hedleye dîyar kerd ke aye cinîyêke Kobanê ra ya û bi 5 tutanê xo Kobanê de cuyêka înan ya asayîş û weş estbî û wina vat: “Kobanê de şer vejîya. Ma keyeyê xo de bî. Karê mi koaforî yo. Tutê mi şîyêne mektebo ke mêrdeyê mi tede xebetîyayêne. Rewşa ma baş bî. DAIŞ hêriş kerd. Ma heme remayî. DAIŞ camîyan ra veng kerdêne vatêne ma do heme Kurdan bikişî. Ma 6 rojan berê sînorî de mendî.”

 

Hedleye da zanayîş ke 5-6 rojan ra dima ameya hetê Tirkîya û wina dewam kerd: “Waya mi Tirkîya de bî. Ma ameyî Riha. Dima ra zî ma ameyî Semsûr. Tu çîyêk ma çinî bî. Kênaya mi şî Kobanê û kesêk uca ra zewecîyaye. Nika ez tena Semsûr de manena. Yew serrî ya ke mi dikanê kuaforî akerdbî.” 

 

‘HDP hetkarî da ma’

 

Hedleye qiseykerdişê xo wina qedênaye: “Ma nika erdlerzî vera reyna raşteyan de mendî. HDP zaf hetkarî da ma. Tena HDP hetkarîya ma kerd. Keyeyê mi zirarêk gird dî. Ma perişan bîyî. Ez keyeyê kênaya xo de menda. Dima ra kone dayî ma. Ez bi waştişê xo Kobanê ra nêvejîyaya. Tutê mi şenik bî. Mêrdeyê mi krîzê zerrî derbaz kerd. La ez do heta peyîya cuya xo têkoşîn bikera. Ez do ne tutanê xo ra ne zî herra xo ra fek vera nêda.”