RIHA - Emîne û Ferît Şenyaşar roja 713ine ê Nobeta Edaletî de serê medyaya komelî de no mesaj pare kerd: "Heta peynîya bi ruhê paştdayîşî. Heta peynî edalet."

 

Merdim û pawitoxê Parlamenterê AKPyî yê Rihayî Îbrahîm Halîl Yildiz 14ê hezîrana 2018ine de qezaya Pirsûsê Rihayî hêrişê keyeyê Şenyaşarî kerd. Netîceyê hêrişî de mêrde û di lajê Emîne Şenyaşare ameyî qetilkerdiş. Nê ser de Emîne Şenyaşar û lajê ci Ferît Şenyaşar 9ê adara 2021ine de vernîya Edlîyeyê Rihayî dest bi çalakîya Nobeta Edaletî kerdî. Çalakîya keyeyê Şenyaşarî roja 713ine de dewam kena. Seba ke peynîya hewteyî de edlîye padaye ya, keyeyî çalakî keyeyê xo yê Pirsûsî dewam kerd.

 

Derheqê babete de keyeyî serê hesabê xo yê medyaya dîjîtale de nê mesajî pare kerd: "Edalet heqîqetî ra vejêno meydan. Dej û dewaya ma yew a! Heta ke kesê qirkerdişî pê ardî...Heta peynî bi ruhê paştdayîşî, heta peynî edalet."