Gulîstan Dursun

 

DÎLOK - Taxa Gozluhuyuk ya Cebelînurî ke rijîyayîşêk gird tede virazîyabî de her roje selahîyetdarî yenê seba xebata tespîtkerdişê xisarî la çi heyfo ke problem nîno çareserkerdiş.

 

6ê Sibate de Mereş de 2 erdlerzî û 20ê Sibate de Hatay de erdlerzêk qewimîya. Di erdlerzê girdî ke merkezê înan Mereş bî de bobelatêk gird ame ciwîyayîş. Her çend ke erdlerzî ra yew aşme derbaz bibo zî hema lazimîyê şarî nêameyî caardiş û problem nîno çareserkerdiş. Erdlerzî de qismêk gird yê taxa Gozluhuyukî ya Cebelînuro ke girêdayeyê Dîlokî yo û 311 nufusê ci estbî de rijîyayîşêk gird qewimîya. Tewr kêm 50 kesî taxe de dinyaya xo bedilnayî.

 

Di roje ewilînan yê erdlerzî de selahîyetdarê dewlete nêşîyî hewarîya şarî, şar bi îmkananê xo xebata xirban kerd. Dewe îdareyê xo bi weyekerdişê heywanan û citkarîye kerdêne. Zafaneyê heywanan zî erdlerzî de binê xirban de mendî. Ekîbê citkaran yê sey traktorî zî binê xirban de mendî û zirarêk gird virazîya. Dewe de hema zî problemê awe û cereyanî nêameyo çareserkerdiş.

 

‘Hetkarî erey ameye’

 

Cinîya bi nameyê Meryem Kayare derheqê babete de qisey kerd û vat ke seba Cebelînur û Islahîye hîna zêde îmkanî ameyî birnayîş û vat: “Vera ke dewan de zirar gird bî zî hetê şirawitişê hetkarîyan de problem estbî. Lazimîyê ewilîn tuwalet û banyo yê. Roja 5ine de ardî la badê aşmêk tesîsat awan kerdî. Hamnan yeno, pakî xeylê muhîm a. Ma do problemanê weşîye bicuyî.”

 

Meryeme qiseykerdişê xo wina dewam kerd: “Ma xo rê yew û peyn herînabî. La ê zî binê xirban de mendî. Nika ma hem hetê ekonomîye de hem zî hetê manewîye de probleman cuyenî. Qeydê kelepulê ma estê, wa paştî bêra dayîş. Na dewe de mîlyar lira zirar esto. Her roje selahîyetdarî yenê. Eke ma bizanê ke do çîyêk nêkerê o wext ma do goreyê aye têbigêrê.”

 

‘Ganî paştî bêro dayîş’

 

Meryeme qiseykerdişê xo yê peyênan de da zanayîş ke keyeyê aye citkar o û vat: “Heta nika derheqê citkarî, çinitiş û weyekerdişê heywanan de tu xebatêke nêameye kerdiş. Dostê ma seba heywanan paştî dayî ma. Dewa ke tewr zêde zirar dîya dewa ma ya. La ma seba citkarî tu paştîdayîşêk nêdî. Ganî paştîdayîş seba ma bêro dayîş. Ma nika nêzanê ke se bikerê.”