Dîlan Babat

 

HATAY - Taxa Tavla ya Defneyî de cinîyê ke mexdurê erdlerzî yê û zerrîwazî pîya werd virazenê û yewbînan rê benê hetkar. Cinîyê mexdurê erdlerzî dîyar kerdî ke ê bi paştîdayîşê zerrîwazan payan ser de yê.

 

Erdlerzê Mereşî ke 6ê Sibate de qewimîyabî ra yew aşme derbaz bî. Yew aşmî yo ke şar bi zerrîwazan reyde birînanê xo pişneno. Qezaya Defne ya Hatayî de pêroyê awanîyan rijîya û yê ke mendî zî xisarê giranî girewtî. Zafaneyê hemwelatîyan ke konî nêgirewtî pawenê ke kon ya zî konteynir înan rê bêro şirawitiş.

 

Hatay de problemê awa pake esto

 

 

Hatay de nika tena xirbî mendî û nika bi hewldayîşê zerrîwazan waştişê hemwelatîyan tay zî bibo yeno caardiş û cuya şarî bi kêmbîyayîşê konan zehmet bena. Bajar de awa pake çin a, nêweşî vejîyayî raşte û zerrîwazî xizmetê awe û weşîye danê şarî.

 

Umudê darê lîmon û portekalan...

 

 

Bajaro ke hema tede xirbî erdî de yê, têkoşînê cuye yeno dayîş. Darê lîmon û portekalan yê ke kişta rîyê yewine yê bajarî de ca gênê, bi rengê xo umudê cuya newe danê û benê umud.

 

Her çend ke îqtîdar biwazo têkilîya zerrîwazan û şarî yewbînan ra bêra birnayîş zî zerrîwazî vera pêro tedayan xizmetê seba şarî domnenê. Yew taxa Defne ya Hatayî ke 5 hezar nufusê ci esto Tavla yo. Tavla se ra 80 rijîya. Zafaneyê hemwelatîyan hema zî kone nêgirewta û bi îmkananê xo baxçeyanê xo de kone ronayî. Cinîyê taxe tewrê zerrîwazan newe ra cuye munenê.

 

20 roje ra tepîya konî dayî

 

Cinîya bi nameyê Seyhan Karama ke problemê nanî vera tewrê cinîyanê taxe nan pewjena dîyar kerd ke AFAD roja 5ine ya erdlerzî de ame taxe û wina vat: "Ma teber de mendî. Heta ke konî ameyî ma teber de mendî. Badê 20 rojan konî şirawitî. Konanê ma zî merdimê ma yê Stenbolî şirawitî. Roja yewine ra nata ma bi paştîdayişê şarî payan ser de yê. Ma bi zerrîwazan ke teber ra ameyî roje de 13 kesî nan pewjenê. Zerrîwazan ke teber ra ameyî tena hetkarî nêkenp. Paştîdayîşêk cidî ya psîkolojîk danê ma. No paştîdayîş ma payan ser de verdeno."