HATAY - Yew cayo ke erdlerzî ra zêde tesîr bî zî Samandagî yê Hatayî yo. Ame zanayîş ke Walîyê Îdîrî ke sey berpirsîyarê Koordînasyonê erdlerzî yê qezaya Samandagî yê Hatayî ameybî tayînkerdiş, hewl dano ke demografîya Samandagî bibedelno. Sewbîna ame vatiş ke Walîyê Îdîrî ke di roje verê cû bi keyayan reyde kombîyayîş viraştbî Walîyê Burdurî rê vato ke 'Ma qey terorîstanê sosyalîst rehet verdê, heme cayê ke vurnayîşê înan çin o ma do wedarnê.'

 

Di erdlerzê ke merkezê înan Mereş bî û 11 bajaran de rijîyayîşê girdî qewimîyayî ser o ra yew aşme derbaz bî. Badê erdlerzî îqtîdar xebata xelisnayîşî erê da dest pêkerdiş û hema zî xeylê problemê şarî nêameyî çareserkerdiş. Roja yewine de zerrîwazî xo resnayî hetkarîya şarî. Îqtîdaro ke waşt hetkarîyan zî asteng bikero, bi walîyanê ke tayînê herêma erdlerzî kerd wazeno demografîya herême bibedelno.

 

Taxa Ataturkî hedef de ya

 

Sere de merkezê Hatayî pêroyê qezayê ci wêran bîyî û şar binê xirban de mend. Hatay de hema hema yew awanîyêke nêmende la reyna zî şar fek herra xo ra vera nêdano. Vera pêro problem hemwelatîyî xover danê. Îqtîdaro ke bi serran o polîtîkaya çinîkerdişî Kurdistan de kerda dewre nika polîtîkaya xo herêma erdlerzî de kerda dewre. Nê cayan ra yew zî taxa Ataturkî ya Samandagî ya Hatayî ya.

 

Walîyê Îdîrî ke ewnîyeno taxa Ataturkî ya Samandagî di roje verê cû bi Walîyê Burdurî ke o zî ewnîyeno qezaya Defne û keyayan reyde kombîyayîş pê ardo. Goreyê xeberanê ke ameyî girewtiş yeno waştiş ke taxe bêmerdim bêra verdayîş. Ame îdîakerdiş ke Walîyê Îdîrî Walîyê Burdurî rê vato ke 'Ma qey terorîstanê sosyalîst rehet verdî? Ma do pêro merkezê vurnayîşê înan çin o wedarnê.’ Ame zanayîş ke Walîyê Burdurî vera nê vatişan de wina vato 'Sey dewlete ti birînan nêpişnenê verde wa ê bipêşnê.'

 

4 roje tu kesêk nêame

 

Yeno vatiş ke di hemwelatîyê taxe awanîyê TOKÎ yê ke verê cû ameyî viraştiş de bêrê cakerdiş. Sewbîna ame vatiş ke şar reaksîyon mojnayo vatişê Walîyî. Hemwelatîyêke ke nêwaşt nameyê xo bido wina vat: "Keyayê Antakya nê vatişan Walî ra eşnaweno. Ê herinda ke planan bikerê, herinda ke tarîx û awanbîyayîşê demografîkan bifikirî qisey kenê. Planê îmarî yê ke goreyê erdlerzî nîyê, qisey kenê. Xora tîya cîya dîyêne û nika zêdêr cîya kenê. Na yew aşme ya ke çîyê ke ma cuyenî raşte de yê. Teber ra tay dezgehan ra hetkarî ame. La şikê ma esto. Paştîdayîşê dewlete qet çin o. Şar hewayo serdin de cuyeno. Ez hirê hewteyî wesayîtî de menda. 4 rojan tu kesêk nêame tîya. Merdim kewtîbî derdê canê xo."