Rozerîn Gultekîn

 

STENBOL - Endama Komîsyonê Heqê Tutan ê Stenbolî yê OHDyî Dîlşah Taş dîyar kerd ke derheqê herêma erdlerzî de prosesêk baş nêameyo kerdiş û vat, hemverê tutan de berpirsyarî bi ca nêameyo, no suc o û vat, tutî çira binê pawitişê dewlete de nîyê, binê pawitişê Tarîkatê Menzîlî de yê.

 

Erdlerzê ke merkezê ci Mereş bi û 6ê Sibate de pê ame, tesîr serê 11 bajaran de kerd, bi des hezaran kesî merdî û bi mîlyonan kesî bêkeye mendî. Bêşik yê ke tewr zêde bi tesîr bî, tutî bî. Roja ewil ra tutê ke ameyî xilaskerdiş û bêkeye mendî berdîyayî bajaranê cîya. Wezaretê Karê Zereyî da zanîş ke 213 tutî bênasname û keye ameyî vînayîş û Wezareta Keye û Xizmetê Komelî zî vat, 78 tutî bênasname ameyî vînayîş. 

 

La seba tutê ke bi polîtîkaya dewlete ameyî vînîkerdiş têkoşînê sazgehê komelê sivîlî dewam keno. Komîsyonê Tutan ê Komeleya Huqûqnasê seba Azadîye (OHD) derheqê babete de herême de cigêrayîşêk kerd. Komîsyon do demê bêro de raporê xo pêşkêş bikero. Endama Komîsyonê Heqê Tutan ê Stenbolî yê OHDyî Dîlşah Taş derheqê babete de qisey kerd.

 

‘Dewlete berpirsîyarîya xo ca nêarde’

 

Dîlşahe vat ke dewlete erdlerzan de berpirsîyarîya xo nêarde ca û nê demî de dewlete seba arêdayîşê cenazeyan şîye. Dîlşahe wina dewam kerd: “Herême de binpaykerdişê girdî estê. Taybetî zî babeta tutan de. Erdlerzî ra dima xeylê tutî bêwayîr mendî. Her kes derde xo de yo û merdimê tutan nêeşkenê xo biresinê înan. Xeylê tutê birîndarî estê. Berpirsîyarîya dewlete tîya de dest pêkena. Berpirsîyarîya dewlete na bî ke nê tutan bipawa.” 

 

‘Xeylê tutî bêkes mendî’

 

Dîlşahe qiseykerdişê xo yê peyênan de nê çîyan ard ziwan: “Dayeyê zelalî çin ê. Heqê tutan ame binpaykerdiş. Dewlete berpirsîyarîya xo ca nêarde. Wezîrîya Xizmetê Komel û Keyeyî berpirsîyara ke tedbîran bigêra. La ma vînenê ke derheqê tutan de dayeyê zelalî kom nêkerda. Eynî wextî de eşkerayîya ke di wezîrî danê zî nakok ê. Wezîrîya Xizmetê Komel û Keyeyî û wezîrîya Karê Zere yewbînan de cîya eşkerayîyan danê. Ma qala çend tutan nêkenê. Ma qala bi hezaran tutan kenê. Ma mecburê ke hesabê nê çîyî bipersê. Çend roje badê erdlerzî çapemenîye de ame vatiş ke 20 tutî berdê vîlayê ÎHHyî yê Beykozî. Muracatê sucî ame kerdiş la ame vatiş ke tehqîqatêk rê ca çin o. Gelo tutî qey binê pawitişê dewlete de yê û qey binê pawitişê Tarîkatê Menzîlî de yê? Ma do çend roje ra dima raporê xo amade bikerê.”