Dîlan Babat

 

HATAY - Gulcan Kaya ya ke vîdeoyêk xo bi mêrde û di tutanê xo reyde çapemenîya komelkî de pare kerd rê hemwelatîyêk kone şirawit. Gulcan Kayaye dîyar kerd ke her çend ke erdlerzî ra yew aşme derbaz biba zî hema probleme înan yê tuwalet û banyoyî dewam keno.

 

Erdlerzê ke merkezê înan Mereş bî ser o ra yew aşme derbaz bî la probleme şarî yê kone, awe, cereyan, tuwalet û banyoyî dewam keno. Yew cayê ke tewr zêde erdlerzî ra tesrî bîyî ra Îskenderunê Hatayî yo. Gulcan Kaya ya ke keyeyê aye xisarêk giran dî, mexduranê erdlerzî ra yew a û hema zî kone de manena.

 

Yew aşmî yo ke hetkarî çin a

 

Gulcane bi tutanê xo reyde konêke şenike de manena û rîskê rijyayîşî yê keyeyê aye vera nêeşkena dekewa zere û wina vat: “Tutê mi timî bermenê. Psîlokojîyê înan xerepîyayo. Ma ameyî tîya la hema zî hetkarî çin a. Bi mêrde û di tutanê xo reyde ma kone de manenê. Banyo û tuwalet çin o. Ma hirê rojan teber de mendî. Ma vêşan mendî. Mêrdeyê mi vîdeoyêk ant û eşt înternetî ser. Nê vîdeoyî ra dima konêke ma rê ameye.”

 

Nêweşî vejîyayî

 

Gulcane qiseykerdişê xo wina qedêna: “Ma wazenê dekewî keyeyê xo ke kelepulanê xo bivejnî la polîsî ma tehdit kenê. Tu çîyêk ma çin o. Ma bi zorî zere ra vejîyayî. Ma bi zorî di koltixî zere ra vet. Reyna ma werd nêvînenê. Seba konbajarî ma name nuşt. Ma yew hewte teber de hewayo serdin de mendî. Tutê mi nêweş kewtî. Konbajaran de nêweşî vejîyayî. Coka ra ma waşt ma konbajarî ra bivejê. Lazimîya ma bi tuwalet û banyo esta. Ma tuwaletê xo zî kone de kenê û dima ra erzenê eşte ser.”