Rozerîn Gultekîn

 

STENBOL - Hemverfeka SODAPî Kezban Konukçuye dîyar kerd ke Newroze roja xoverdayî ya. Aktîvîsta TJAye Eylem Saricaye da zanayîş ke do raşteyan de azadîya Abdullah Ocalanî biqîrê û TOPî ra Perîhan Kocaye zî dîyar kerd ke Newroza emserrî do biba Newroza hesab persayîşî. 

 

Bi serkêşîya Kongreya Demokratîke ya Şaran (HDK) û Partîya Demokratîke ya Şaran (HDP) Newroza 2023yî do bi şîarê “Her der Newroz, Her dem Azadî” û “Bi adirê Newroze ver bi azadîye ” bêro pîrozkerdene. Deklarasyonê Newroze Merkezê Kultur û Hunerî yê Dicle Firatî yê Sûrê Amedî de ame eşkerakerdene. Temsîlkarê dezgeh û komeleyê sivîlî û xeylê partîyê sîyasîyî tewrê eşkerayîya deklerasyonî bîbî. Newroze do emserr Stenbol de 19ê adare de Raşteyê Yenîkapiyî de bêra pîrozkerdiş. Newroza emserrî do dîyarîyê kesê ke 6ê Sibate de erdlerzî de dinyaya xo bedilnayî bêra kerdiş.

 

Derheqê Newroza emserrî de aktîvîsta Tevgerê Cinîyanê Azadan (TJA) Eylem Sarica, Hemverfeka Platformê Paştîdayîşê Sosyalîstan (SODAP) Kezban Konukçu û Endama Heyetê Verfekan ya Partîya Azadîya Komelî (TOP) Perîhan Kocaye ajansê ma rê qisey kerd.

 

8ê Adare ver bi Newroze ra 

 

Eyleme destpêkê qiseykerdişê xo de bale ant erdlerzo ke qewimîya ser û dîyar kerd ke do Newroza emserrî de hêrsê xo yê hemverê peygoşîya ke erdlerzî de xo mojna, raşteyan de bîyarê ziwan. Eyleme wina bale ant pîrozkerdişê Newroza emserrî ser: “Şarê ma do emserr raşteyan de hesabê mexduranê erdlerzî biperso. Ma do raşteyan de kesê ke dinyaya xo bedilnayî vîr bîyarê. 8ê Adare de ma senî hemverê şîdetê sîstemî de vejîyayî se ma do Newroze de zî hêzê xo yo ke vejîyayo raşte bimojnê.”

 

'Do azadîya Ocalanî biqîrê'

 

Eyleme qiseykerdişê xo yê peyênan de dîyar kerd ke hemverê tecrîd û seba azadîya fîzîkî ya Rayberê PKKyî Abdullah Ocalanî raşteyê Newroze de vengê xo berz bikerê û wina domna: “Ma par seba Newroze vat Newroza 50ine, ma seba azadîya fîzîkî ya Rayberê Şarê Kurdî şîyî raşteyan û emserr ma do bi eynî amacan şêrî raşteyanê Newroze. Waştişê ke 8ê Adare de ameyî vatiş do Newroze de zî bêrê vatiş.”

 

'Newroze roja xoverdayîşê şaran a'

 

Hemverfeka Platformê Paştîdayîşê Sosyalîstan (SODAP) Kezban Konukçuye zî  destpêkê qiseykerdişê xo de bale ant polîtîkaya îqtîdar û krîzê ekonomîye ser û vat: “Nê erdlerzî de vejîya raşte ke umudo tewr gird hetê şaran ra vejîya averberdiş. Şaro ke na cografyaye ser de ciwîyeno paştîdayîşêk gird mojna û umudê xo ganî kerd. Ganî ma paştîdayîş û têkoşînî gird bikerê, cuyêka newe awan bikerê. Sewbîna ganî ma hêrsê xo bi xoverdayîşî bivejnê merheleya tewr berz. Hemverê îqtîdaro faşîst de hîna zêde têkoşîn danê. Newroze roja xoverdayîşî ya. Coka ra zî emserr Newroze de ma do hem kesê ke erdlerzî de dinyaya xo bedilnayî vîr bîyarê û hem zî hemverê faşîzmî de biqîrê. Ma veng dane kedkar, cinî, ciwanan ke raşteyê Newroze de cayê xo bigîrê.”

 

'Do Newroze de hesab bipersê' 

 

Endama Heyetê Verfekan ya Partîya Azadîya Komelî (TOP) Perîhan Kocaye zî dîyar kerd ke şîn, dej û hersê şarî zêde yo û wina ercnayîş kerd: “Newroze nameyê xoverdayîş û serewedarnayîşî ya. Newroza 2023yî do biba Newroza hesab persayîş, bedilnayîş û serkewtişî. Emserr bi coşêk gird do govend nêra çarnayîş la ma do raşteyan de hêrsê xo bîyarî ziwan û vajî ke ‘Dewlete kam ca de ya’. Hetê şaran ra demêk dergo ke adirê azadîye ameyo tafînayîş. Ma do Newroze sey mîladê awankerdişê welatê xo pêşwazî bikerê. Şorişgêr, sosyalîst, femînist, welatparêz û şar senî ke 6ê Sibate de erdlerzî de paştîdayîşê xo gird kerd, 8ê Adare de cinîyan hêrsê xo açarna serewedarnayîşî, 1ê Gulane û 14ê gulane de do reyna welatê xo awan bikerê, ma bi înan reyde Newroza 2023yî pêşwazî bikerê. Na çarçewa de serkewtiş do bibo yê şaran.”