Dîlan Babat

 

HATAY - Hatay de xirbê ke yenê arêdayîş benê nizdîyê bajar, cayê ke darê zeytûnî estê û herêmê nizdîyê konbajaran de yenê vilakerdiş. Xirbê ke yenê vengkerdiş zirar danê xoza, hewa û merdiman.

 

Erdlerzo ke 11 bajaran de xisarê girdi viraş ra hirê roje dima xebata cigêrayîş û xelisnayîşî dîyaye destpêkerdiş. Peygoşîya ke ameye kerdiş vera xeylê merdimî binê xirban de dinyaya xo bedilna. Nika zî cayê ke rijîyayî de xebata wedarnayîşê xirban yena rayraberdiş. Bajaro ke tewr zêde erdlerzî ra zirar dî û  raşte ra wedarîya Hatay o. 34 hezar û 210 kamyonî seba wedaritişê xirban şirawîyayî Hatay. Heta nika 394 xirbê awanîyan wedarîyayî. Sewbîna bi wedaritişê xirban problemêk bîn vejîya raşte û xirbê ke yenê arêdayîş mîyanê darê zeytûnan de yene vengkerdiş. No çî zî xo reyde texrîbkerdişê xozaye ano.

 

Xeylê xirbî raşteyê Kanî yê Altinozuyî de yene vengkerdiş. No ca 10 kîlometre dûrê bajarî yo. Tîya de hîna zêde darê zeytûnî estê. Sewbîna kişta texrîbatê xozaye de karkerê ke nê karî kenê zî bê asayîş xebetîyenê. Raşteyo ke tozêk zêde tede esto de karkerî bêmaske xebetîyenê.

 

Sewbîna xirbê ke 10 kîlometre dûrê bajarî yanî raşteyê Balliozdeyî de yenê vengkerdiş de tewr zêde darê zeytûnan estê. Reyna sanayîya şenik ya taxa Odabaşi zî bîya cayê arêdayîşê xirban.

 

Xirbê qezaya Samandagî ya Hatayî zî nizdîyê stadyumê qezaye de yenê vengkerdiş. No ca nizdîyê konbajaro ke seba mexduranê erdlerzî ameyo awankerdiş ra yo. Vengkerdişê xirban hem zirar dano mexduran û hem zî zirar dano xoza. 

 

Berkant Dogan bi zerrîwazî xizmetê weşîye dano û mîyanê Tora Paştîdayîşê Erdlerzî de ca gêno. Berkant cayo ke xirbî yenê vengkerdiş de cigêrayîşan keno û wina bale ant rewşe ke tedeyî ser: “Xirbê ke yenê vengkerdiş zirarêk gird danê xoza. Sewbîna kesê ke nê karî kenê zî bêmaske xebetîyenê û ganî xirbê ke bêrî vengkerdiş yewbînan ra bêrê cîyakerdiş. Netîceyê vengkerdişê xirban de tozêk gird vejîyeno raşte û no zî zirar dano hewa. Pêşnîyarê ma no yo ke seba weşîye ganî maske herême de bêrê vilakerdiş û şuxulnayîş. Çike beno ke ameyox de nêweşîyê keseba zêde bivejê. Ma nêwazenê kesê ke erdlerzî ra xelisîyayî dima ra bi kanserî ra dinyaya xo bibedilnê.”