Melîke Aydin

 

ÎZMÎR - Endama Meclîsê Cinîyan ya Hûmara 2ine ya Egîtîm Senî ya Amedî Demet Onale da zanayîş ke Hanîfe ya ke dinyaya xo bedilnaye tena ameye verdayîş û qetilkerdişê aye ra dima ra tena ameye verdayîş. Demete seba wayîrvejîyayîşê Hanîfeye vengê tewrbîyayîşê roniştişê 12ê Gulane kerd. 

 

Qezaya Dîkîlî ya Îzmîrî de Hanîfe Çakiciye 11ê Tebaxa 2022î de Termînalê Otobusan ya Dîkîlîyî de hetê Haydar Çakiciyo ke aye reyde zewecnayebî ra ameye qetilkerdiş. Diyîne roniştişê dewaye Edlîyeya Bergama de ame dîyîş. Seba ke keyeyê Hanîfeye dewa de tepîya ancîyaye avûkatêk ke Hanîfe bipawo çinî bî. Mehkema de kerdox nê Hanîfe ameye muhakemekerdiş. Her çend ke dewaya xopawitişî bî zî waştişê Komîsyonê Heqê Cinîyan ya Baroya Îzmîrî nêameye qebulkerdiş. Avûkatê wezîrîya xizmetê keye û komelî do Hanîfe roniştişo bîn yê dewaye de bipawo.

Hanîfeya ke 16 serrîya xo de ameye zewecnayîş her tim şîdet dîyêne. Cinîyî badê qewimîyayîşî şîyî dewa Delîklîtaşî û tewrê merasîmê cenazeye bîyî. Platformê Cinîyan yê Dîkîlî, Baskê Cinîyan yê Dîkîlî yê CHPyî, Konseyê Bajarî yê Dîkîlî û cinîyê dewe tewrê merasîmê cenazeye bîbî.

 

‘Mîyanê şîdetî de têkoşînê cuye’

 

Endama Meclîsê Cinîyan ya Hûmara 2ine ya Egîtîm Senî ya Amedî Demet Onale derheqê babete de qisey kerd. Demete qiseykerdişê xo de wina vat: “Demêk derg îdîaname nêame amadekerdiş. Roja mehkema de xeylê tedbîrî ameyî girewtiş. Vera heme qeraranê tedbîrî nêwaştî ma bigêrî zerre. temsîlkarê dezgehan girewtî. Ma 7 kesan ra 2 tenî mendî. Keye dewaye ra ancîya. Her tim şîdet vînayêne. Di tutê aye estbî. Dîkîlîye de mendêne. Bi desan reyan muracatê KADESî kerda. Qerarê dûrîfînayîşî dîyayo kerdoxî. Hanîfe lîse teber ra wanena û seba ke şêra unîversîte hewl dana. Şina stargehî. La kiştox her reye aye tehdit keno.” 

 

Dewlete Hanîfe nêpawite

 

 

Demete dîyar kerd ke Hanîfe bi desan reyan muracatê polîsan kerda, stargehan kerda û vat: “Wexto ke cinayet pê yeno Hanîfeye binê pawitişî de bî. La dewlete Hanîfe nêpawite. Cayêk sey otogarî ke polis û cendirmeyî tede estî de, verê çiman de ameye qetilkerdiş. Wextê mehkema de zî vatişê ke Hanîfe yena hedefgirewtiş ameyî vatiş. Persê ke paştî danê kerdoxî estbî. Yanî kiştox nê, Hanîfe ameye muhakemekerdiş. Cuya Hanîfeye ameye muhakemekerdiş. Tu kesêk ke Hanîfe bipawo çinî bî. Seba ke keye ancîya avûkat zî çinî bî.” 

 

Demete peynîya qiseykerdişê xo de veng daye heme cinî û dezgehanê cinîyan ke Hanîfeye tena nêverdê û vat ke ganî her kes tewrê roniştişê 12ê Gulane bibo.