Dîlan Babat

 

HATAY - Husnîye Okyaye ya ke taxa Karaalî ya qezaya Defne ya Hatayî de cuyena dîyar kerd ke înan hema zî kon nêgirewtî û hetkarîya ke yen ara zî tu fêdeyêk nêgênî. Husnîye vat ke nasnameyê xo vera raştê cîyayîye yenê.

 

Tesîrê erdlerzo ke merkeze ci Mereş bî dewam keno. Taxa Karaalî ya Defne ya Hatayî ke zafê hemwelatîyanê taxe elewîyanê ereban ra pê yeno de şar hema zî hetkarîyêke baş nêgirewt. Hemwelatîyî dîyar kerdî ke sey nasnameyêke zaf cîya nizdîyê înan benê û bi îmkananê xo cuya xo domnenê.

 

‘Ma bi ters cuyenê’ 

 

Cinîya bi nameye Husnîye Okyaye da zanayîş ke keyeyê înan xisarêk gird dîyo û coka ra konê seraye de manenê û vat: “Tesîrê erdlerzî hema zî serê ma de esto. Ma tay kelepulanê xo keyeyê ma yo xisarin ra vet. Cayo ke ma tede cuyenê gir o. Ma bê maben vanê. Merdimê ma cîranê ma dinyaya xo bedilnayî. Bajarê ma wêran bî. Ma hema zî tersenê.”

 

6 keye konê seraye de cuyenî

 

 

Husnîyeye da zanayîş ke no yew aşmî yo ke konê seraye de manenê, seba konî muracat kerdî la no yew hewteyo ke kon nêresayo destê înan û wina vat: “Paştîdayîşê awe dewam kena. Ma seba kone şîyî AFAD. Kizilay vat ke do kone bierşawî. Yew aşmî yo ke ma pawenê. Wexto ke erdlerz newe qewimîya çîyêk nêameyêne vîrê ma. Dimake ma ameyî vîrê xo ser zerrîwazî awe dayî ma. Ez tena manena. Keyeyê merdimanê mi rijîya. Başna û cayî mirdê ma nêkenê.  Ma 6 keye konê seraye de cuyenî.”

 

Cîyakarî canê ma dejna

 

Husnîyeye bale ant cîyakarîye ser û wina dewam kerd: “Şokê erdlerzî vera sere de cîyakarî qet nêame vîrê ma. Yew aşme erdlerzî sero ra derbaz bî, ma dî ke heme hetgirê îqtîdarî hetkarî gênê. O wext ma fehm kerd. Ma xeylê hîssin bîyî. Ma hemwelatîyê taxe heme çîyê xo yewbînan rê pare kerd. La ma nasnameyê xo vera raştê cîyakarîye ameyî. No canê ma dejna. Hetê dewlete ra tu çîyêk nêame ma rê.”

 

Barê cinîyan di qat bî

 

Husnîyeye qiseykerdişê xo yê peyênan de ard ziwan ke barê cinîyan di qat giran bî û vat: “Barê cinîyan erdlerzî ra dima di qat giran bî. Hetê pakîye de probleme girdi estî. Ma verê cû her hewte cayanê xo şitêne. La nika wina nîyo. Wexto ke kon cemedîyeno ma nêeşkenê zerre de bimanê. Wexto ke beno germ zî ma nêeşkenê bimanê. Tutê ma yê şenikî estê. Binê konî herre ya, her şewe cemed tepişeno. Ma nêeşkenê werd bivînî la lazimîyê ma yê bînî estê. Ca, betanî, konteynir.”