Sema Çaglak

 

ŞIRNEX - Komîteya Amedakar ya Newroze ya Cizîrî ra Zîlan Ecevîte dîyar kerd ke seba Newroza emserrî amadekarîyê xo dewam kenê û vat: “Hem seba hesabpersayîşî hem zî seba no îqtîdaro talankerî bişirawî serê eşteyê tarîxî ma do raşteyan de adirê Newroze gur bikerê.”

 

Newroza 2023yî do bi şîarê “Her der Newroz, Her dem Azadî” û “Bi adirê Newroze ver bi azadîye ” 43 merkezan de bêra pîrozkerdiş. Pîrozkerdişê Newroze 18ê Adare de do dest pêbikero. Do Cizîrê Botanî de zî Newroze 21ê Adare de bêra pîrozkerdiş. Derheqê babete de Komîteya Amedakar ya Newroze ya qezaya Cizîrî ya Şirnexî û Hemsereka Partîya Demokratîke ya Şaran (HDP) ya qezaya Cizîrî ra Zîlan Ecevîte qisey kerd. 

 

‘Newroza emserrî newrozêke tarîxî ya’

 

Zîlane dîyar kerd ke ê demêko tarîxî de Newroze pêşwazî kenê û vat: “Newroze her serre bi coş û heyecanêk gird ameyêne pîrozkerdiş la çi heyfo ke emserr erdlerzo ke 11 bajaran girewt binê tesîrê xo vera ma bi şîn Newroze pêşwazî kenê. Ma Newroza emserrî dîyarîya kesê ke erdlerzî de dinyaya xo bedilnayî kenê. Newroze seba şaran hetê têkoşîn û xoverdayîşî de ercin a. Hemverê zilmê Dehakan de xoverdayîşê Kawayî ya. Serranê 1990an ra nata xoverdayîşê Berîvanan heta roja ewro manaya Newroze cîya bîya. Emserr ma sey Botanî bi 7 qezayanê xo reyde Cizîr de kom benê û Newroze pîroz kenê. Ma amadekarîya xo ya seba Newroze da destpêkerdiş û heta peynî zî do xebata ma dewam bikera.” 

 

‘Şarê Botanî erdlezî de raşteyan de bî’

 

Zîlane ard ziwan ke şarê Botanî roja ewile ya erdlerzî ra heta nika hetkarî û paştîya xo ya seba mexduranê erdlerzî dewam kerd û vat: “Şarê ma heta nika mexduranê erdlerzî tena nêverda û bi heme îmkananê xo seba bajaranê ke tede erdlerz pê ame seferber bî. Dayîkanê ma ra bigêrêne hema heme ciwanan pêro raşteyan de bî û paştîya xo kêm nêkerdî.”

 

‘Ma do hesab bipersê’

 

Zîlane da zanayîş ke şar emserr Newroze de şînê xo do biaçarno hesab persayîşî û wina dewam kerd: “Ganî şarê ma emserr raşteyanê Newroze pir bikero. Ma her çend ke binê veristîya erdlerzî de Newroze pêşwazî bikerî zî ma do îqtîdarî ra hesab bipersê. Çimkî bi des hezaran merdimî binê xirban de ameyî verdayîş, bi des hezaran kesî zî dinyaya xo bedilnayî. Şar erdlerzî de terke mergî ame verdayîş. Ma do raşteyê Newroze de cewab bidê berpirsîyaran.”

 

Seba tewrbîyayîşê Newroze veng

 

Zîlane peynîya qiseykerdişê xo de seba Newroza Cizîrî veng kerd: “Hem seba hesabpersayîş û hem zî seba şirawitişê îqtîdaro talanker ma do raşteyan de bê. Hemverê nê sîstemê dîktatorî ke dişmenîya cinîyan keno û şarî heme tewir krîzan reyde rî bi rî verdeno de ma do têkoşînê xo dewam bikerê û do ci bişirawî serê eşteyê tarîxî. Ma do adirê Newroze gur bikerê û ma veng dane ke wa her kes tewrê Newroze bibo.”