MERKEZÊ XEBERAN - Herêmê erdlerzî varayîşê varano ke no çend roje yo vareno vera mexdurê erdlerzî rewşêka zehmetin ancenê. Riha û Semsûr de varayîşî ra laser werişt. Xeylê keye, dika, awanîyê fermî, rayîr, pird û tunelî binê awe de mendî. Semsûr û Meletî de zî mexdurê erdlerzî rojanê zehmetinan cuyenî. 

 

Riha û Semsûr de varayîşî ra laser werişt. Kesêkî dinyaya xo bedilnaye, 4 kesî vînî bîyî û xeylêk kesî mehsûr mendî.

 

Qezaya Haliliye de çatrayîro ke di aşmî verî Erdoganî akerdişê ci kerd û sey xizmetê girdî ame mojnayene, tîya zî merdimê ke mehsûr mendê est ê.

Riha zî varayîşî tesîrê xo ramojna. Keyeyî, cayê karî binê laserî de mendê. Reyna rayîr, pird û tunelî pê awe bîyî de. Seba ke vera lasaran tedbîrî nêameyî girewten şar vera îdarekaran hêrsbîyaye yo. Tunelo ke binê awe de mend, 6 kesî tede mehsûr mendî. No çatrayîr Riha û Dîlokî yewbînan gire dano.

 

Reyna qezaya Eyyubiye de zî qatê yewin ê Newêşxaneyê Cigêrayîş û Perwedeyî de unîteyê ciewnîyayîşê giranî binê laserî de mend. Neweşî neweşxaneyanê bînan rê ame sewqkerdene.

 

Semsûr 

 

Bade erdlerzî mexdurî binê şert û mercanê giranan de cuya xo domnenî. Badê varayîşê varano zêde yê çend rojan mexdurê erdlerzî yewna mexdurîyetêk cuyayî. Mexdurê erdlerzî de binê awe de mendî pêroyê roje de deste înan de huye xebetîyayî.

 

Semsûr de erdlerzî ra dima bi hezaran awanîyî rijîyayî û hema hema awanîya ke xisar nêdîya nêmend. Şarê herême konan de cuya xo domneno. Roja yewine ya erdlerzî ra nata hemwelatîyî nêewtanenê ke şêrî keyeyanê xo yê xisarinan û teber de cuyenî. Her çend ke erdlerzî ra 37 roje derbaz biba zî hema xoresnayîşê kon û konteyniran zehmet o. 

 

Meletî 

 

Qezaya Wêranşarî ya Meletî de konê mexduranê erdlerzî binê awa varanî de mend. Bi des hezaran hemwelatîyî nika erdlerzî vera konan de cuyenî. Varanê Wêranşarî de raşte, kuçe û taxî binê awe de mendî. Yeno pawitene ke varan heta serê sibayî zî dewam bikero.