WAN - Cinîyan dîyar kerd ke do 19ê Adare de bi kincanê xo yê herêmî yê kurdîyan Keleha Wanî de bibê û vatî: “Ma do bi govend û tilîlîyan rengê cinîyan berê raşteyan. Ma heme şarê xo dawetê Newroze kenê.”

 

Partîya Demokratîke ya Şaran (HDP), Partîya Herêmê Demokratîkî (DBP), Tevgerê Cinîyanê Azadan (TJA) û Kongreya Komela Demokratîke (KCD) 10 Adare de Amed de bi şîarê ‘Her ca Newroze her dem azadî’ bernameyê Newroze ame deklerekerdiş. Newroza emserrî do bi paştîdayîşê şarê herêma erdlerzî vêra pîrozkerdiş. Serhedî de zî do 19 merkez, qeza, bajarok û dewan de pê bêra. Cinîyê wanijî Newroza Wanî ra ver ke do 19ê Adare de bêra pîrozkerdiş qisey kerdî.

 

Kumru Sungur da zanayîş ke aye emrê xo yê şenikîye ra nata tewrê Newroze bena û vat ke şar do vera pêro tedayan raşteyan nêterikno û şar zextan qebul nêkeno.

 

‘Ma renge cinîyan benê raşteyan’

 

Cinîya bi nameye Hurîyeye zî dîyar kerd ke ê Newroze bi govend û tilîlîyan pêşwazî kenê û wina dewam kerd: “Ma renge cinîyan bene raşteyan. Kêfweşîya şarî ya raşteyan motive yo. Roja Newroze kesêk taxa ma de nêmaneno. Tena ma nêşinê. Her kes şino. Ma her kesî dawetê Newroze kenê.”

 

‘Sembola bîyayîşî ya’

 

Fatma Çakiltaşe zî Newroza her kesî pîroz kerd û ard ziwan ke Newroze sembola azadî û bîyayîşî ya û wina bale ant astengîyan ser: “Serranê peyênan de Newroze her tim yena astengkerdiş. Newroze roşanê ma ya. Sembola bîyayîşê ma ya. Ez veng dana heme cinîyan. Ganî wurzê payan ser. Ganî şarê Kurd êdî şîyar bibo.”

 

‘Ma amade yê’

 

Mercan Cavgule zî nê çîyan ard ziwan: “Newroze roşanê Kurdan a. Serkewtiş do bibo yê ma. Ma hadre yê. Sey her serre ma do emserr zî adirê Newroze tafînî. Ma do bi kincanê xo yê herêmîyan ê kurdî raşteyan de bê.”

 

Sedefnur Aynaye zî bale ant Newroze ser û vat ke Newroze seba aye yena manaya aştî û azadîye. Cinîya bi nameyê Elîf Karabulute zî dîyar kerd ke Newroze azadîya komelî temsil kena û vat ke ê bi umudê cuyêka azade Newrozêka azade wazenê.